कार्तिकनिसें ध्यबा बन्द

नेतातय्सं मोहनि मधासे बैठक च्वनीगु

येँ (सन्ध्या टाइम्स)/वइगु असोज २१ गते सःतातःगु संसदया बैठक न्ह्यः हे राजनीतिक दलतय् दथुइ राजनीतिक सहमति मजुल धाःसा वयां लिपा सरकारं सरकारी धुकूपाखें ध्यबा लिकाये मखनीगु खँ धाःगु दु ।

वंगु प्यला न्ह्यवंनिसें अवरुद्ध जुयाच्वंगु सदन चायेकेगु निंतिं माओवादी, एमाले व कांग्रेसया दथुइ वंगु छवाः न्ह्यवंनिसें निरन्तर बैठक च्वनाच्वंसां लिच्वः धाःसा पिहां वये फयाच्वंगु मदु। अथे खःसां थ्वहे महिनाया दुने यदि छुं हे सहमति मजुल धाःसा कार्तिक १ गतेनिसें सरकारं थम्हं दयेकातःगु बजेट कथं ध्यबा लिकयाः खर्च याये मदइगु जूगुलिं वयां न्ह्यः हे छगू निर्णय काये हे मालीगु खँय् धाःसा स्वंगू दल दथुइ सहमति कायम जूगु खँ सीदुगु दु ।

थ्वहे झ्वलय् थौं एमालेया अध्यक्ष झलनाथ खनाल व कांग्रेसया सभापति गिरिजाप्रसाद कोइराला दथुइ खँल्हाबल्हा जूगु दु। कोइराला निवास महाराजगञ्जय् जूगु उगु सहलहय् वय्कःपिनि दथुइ याकनं हे समस्या ज्यंकेगु बारे सहमति जूगु खँ धाःगु दु ।

अथे हे वय्कःपिनि दथुइ समस्या ज्यंकेगु निंतिं उच्चस्तरीय राजनीतिक संयन्त्र दयेकेगु व उगु संयन्त्रय् मेगु राजनीतिक पार्टीयात नं सहमतिइ हयेगु बारे नं सहलह जूगु खः। लिसें बैठकय् क्वःछिनातःगु इलय् हे संविधान च्वये सिधयेकेगु व शान्ति प्रक्रियायात तार्किक निष्कर्षय् थ्यंकेगु बारे नं सहलह जूगु खः ।

उखे एमालेया महासचिव इश्वर पोखरेलं धाःसा ई यक्व हे वनेधुंकूगु व इलय् हे राजनीतिक पार्टीतय् दथुइ सहमति मजुल धाःसा तःधंगु हे नोक्सान जुइगु खँ धयादीगु दु।
उखे माओवादीया उपाध्यक्ष नारायणकाजी श्रेष्ठं स्वंगू दल दथुइ सहमति यानाः न्ह्याः वनेगु बाहेक मेगु विकल्प हे मदु धासें उगु सहमति असोज २१ गते न्ह्यः हे जुइमाःगु बिचाः
प्वंकादीगु दु ।

मोहनि क्वचायेवं हे सदन च्वनीगु व अन हे सहमति कायम यायेमाःगु जूगुलिं राजनीतिक नेतातय्सं मोहनिया बिदा मधासे हे बैठक च्वनाः निर्णय याइगु खँ धाःगु दु ।

माओवादीं सतक व सदनं आन्दोलन न्ह्याके धुंकाः जूगु सहमति लिपा पेश्की बजेट पारित यायेत स्वन्हुया निंतिं सदन चायेके बिउगु खःसा लिपा सहमति कथं सरकारं थःपिनि बचं पूमवंकूगु धासें हाकनं सदन व सतकं आन्दोलनयात तच्वयेका यंकूगु खः। सदन अवरुद्ध जुयाच्वंगु लत्या दयेधुंकल ।