पार्टी नामं 'माओवादी' चीकीगु
अमेरिका भ्रमण सफल जूगु अर्थमन्त्रीया दावी
नेकपा माओवादी या नां लिपा वनाः 'नेपाल कम्युनिष्ट पार्टी' जक तयेगु खँ माओवादीया वरिष्ठ नेता डा. बाबुराम भट्टराईं कनादीगु दु । अमेरिकाय् जूगु अन्तर्राष्ट्रिय आर्थिक सम्मेलनय् ब्वति थौं नेपाः लिहां वयेगु झ्वलय् अन्तर्राष्ट्रिय विमानस्थलय् पत्रकारतलिसे खँ ल्हासें वय्कलं थ्व खँ धयादीगु खः ।
थःपिंसं धयाच्वनागु जनगणतन्त्र जनवादी गणतन्त्र मजुसे जनताया गणतन्त्र खः धयादिसें वय्कलं मेगु राजनीतिक पार्टीतय्सं उकियात गलत रुपं व्याख्या यानाच्वंगु द्वपं नं बियादिल ।
जनवादी गणतन्त्र थःपिनिगु पार्टी नीति मखु धयादिसें वय्कलं थःपिनि दस्तावेजयात अध्ययन यायेत नं मेगु राजनीतिक पार्टीया नेतातय्त सुझाव बियादिल ।
थःगु अमेरिका भ्रमण सफल जूगु दावी यासें वय्कलं सरकारया नीति व ज्याझ्वःयात अन्तर्राष्ट्रिय समुदायपाखें समर्थन याःगु खँ नं कनादीगु दु ।
न्हूगु नेपाः दयेकेगु निंतिं थम्हं अन्तर्राष्ट्रिय दातृ समुदाययात थप आर्थिक ग्वाहालि यायेत इनाप यानागु खँ कनादिसें उकिया निंतिं नं दातृ समुदाय सकारात्मक दुगु खँ वय्कलं कनादीगु दु ।
अमेरिका भ्रमणया झ्वलय् थम्हं अमेरिकाया अर्थमन्त्री जर्मनीया अर्थमन्त्री व थीथी देय्या अर्थमन्त्रीत नापलानागु व वय्कःपिं लिसे जूगु खँल्हाबल्हा सकारात्मक जूगु खँ कनादिसें डा भट्टराईं नेपाःयात आर्थिक ग्वाहालि यायेगु निंतिं उपिं तयार दुगु खँ नं कनादीगु दु ।
