राष्ट्र संघय् प्रधानमन्त्रीया ब्वति

संयुक्त राष्ट्र संघया महासभायात संवोधन यायेगु लागिं प्रधानमन्त्री माधव नेपाल उखे प्रस्थान जुयादीगु दु। राष्ट्र संघया महासभायात नेपाःया सरकार प्रमुखया हैसियतं वय्कलं संवोधन यानादी। विश्वया फुक्क हे देय्या राष्ट्र प्रमुख व सरकार प्रमुखत मुनीगु थ्व महासभाय् संवोधन यायेगु हरेक देय्या कार्यकारी प्रमुखया छगू म्हगस थें जुयाच्वनी।
थौंकन्हय् नेपाः नं संयुक्त राष्ट्र संघया हे निगरानीइ च्वनाः शान्ति प्रक्रियाय् न्ह्याः वनाच्वंगु दु। तर नेपालय् राष्ट्र संघीय निकाय अनमिन व थुकिया पदाधिकारीतय्सं म्हिताच्वंगु भूमिका धाःसा सर्वसाधारण दथुइ विवादया विषय जुयाच्वंगु दु। उकिं देशय् न्हूगु संविधान वये न्ह्यः हे अनमिनं गुण्टा कसे यायेगु शुरु यायेधुंकूगु दु। थज्याःगु परिस्थितिइ राष्ट्र संघया महासभाय् नेपालं न्ववाइगु खँ अवश्य नं महत्वपूर्ण जुइ। मेगु खँ, नेपालय् जारी जुयाच्वंगु शान्ति प्रक्रियायात सफल यायेगु खःसा थुकी राष्ट्र संघया सकारात्मक व सक्रिय भूमिका अतिकं आवश्यक जुइ। छाय्धाःसां नेपालय् शान्ति वःगु हे राष्ट्र संघ सहितया मेहनतं खः। आः शान्ति प्रक्रियाय् वनेबलय् विद्रोही माओवादीया सैनिकतय्त छु यायेगु धइगु न्ह्यसः वइ। माओवादी सेनायात नेपाली सेनाय् ल्वाकछ्यायेबलय् सेनाया ल्याः अप्वयेफु धइगु न्ह्यसः वयाच्वंगु दु। अप्वःपिं सेनायात राष्ट्र संघया शान्ति सेनाय् छ्वये फत धाःसा थुकिं नेपाःया समस्या हल याना बीगु जक मखु अःखतं उकिं नेपाःयात फाइदा बीगु ज्या तकं याइ। प्रम नेपालं थुखेपाखे नं छुं ज्या याना वःसा व बांलाइगु खः ।

More Stories Like this