वय्कः उपन्यास च्वइम्ह डाक्टर

कृष्ण

मनूतय्त रुची व चाहना दयेवं छुं नं कथंया पंगलं ची मफइगु जुयाच्वन। थः मचांनिसें हे नेपालभाषाया थीथी साहित्य च्वयेगुली संलग्न जुयाच्वनादीम्ह डा. तुल्सीनारायण श्रेष्ठ अज्याःम्ह हे छम्ह अलग्ग लजगाः यानाः नं साहित्य व कलाय् उलि हे भ्यलेपुनादीगु दु। डा. तुल्सीनारायण श्रेष्ठ मोडेल अस्पतालय् ज्या यानाच्वनादीगु दु। अथे खःसां छम्ह उपन्यासकार व च्वमि कथं नं वय्कःयात आपालं मनूतय्सं म्हसीकातःगु दु। वय्कलं नेपालभाषां मदिक थःगु च्वसुत पिथनाच्वंगुलिं यानाः नं वय्कः छम्ह चिकित्सकया नाप नापं नांजाःम्ह च्वमि कथं कायेमाः। थौं स्वयां पीखुदँ न्ह्यः २०२० सालय् वय्कः हेल्थ असिस्टेण्ट कथं स्वास्थ्य सेवाय् प्रवेश यानादीगु खः। नेपालय् डाक्टर ब्वंकेगु शुरु यायेवं स्वास्थ्य लागां हे सेवा यायेगु तातुनाः २०४२ सालय् न्हापांगु पुचलय् वय्कलं डाक्टर पास यानादीगु खः ।

विक्रम संवत् १९९६ सालय् यलया इखाछेँ वडा नं. २ लय् जन्म जूम्ह डा. तुल्सीनारायण श्रेष्ठं आः नकतिनि हे जक 'प्रतिज्ञा' नांगु नेपालभाषाया उपन्यास पिथनादिल। वयां न्ह्यः वय्कलं २०१७ सालय् दबू प्याखं 'ग्वालि' च्वयाः म्हितका नं दिल। अथेहे २०४८ सालय् खय् भाय्या 'शान्ति' चिबाखं मुना व २०५० सालय् 'देवी' उपन्यास पिथनादिल। अथेहे थीथी पत्रपत्रिकाय् नं नेपालभाषा व नेपाली भाषां आपालं च्वसुत पिथनादीगु दु। डम्बरबहादुर श्रेष्ठ व भुवनमाया श्रेष्ठया काय डा. तुल्सीनारायण श्रेष्ठं मांभाय् पुचःपाखें ११२५ या धर्मदित्य धर्माचार्य सिरपाः नापं थीथी संस्थापाखें सम्मान, प्रशंसापत्र व सिरपाः प्राप्त यानादीगु दु। पाटन हाइस्कुल पाटनध्वाखां एसएलसी पास यानादीम्ह वय्कः नेपालभाषा न्हिपौ 'सन्ध्या टाइम्स'य् नं नियमित रुपं स्वास्थ्य सम्बन्धी लेख रचना च्वयादीम्ह च्वमि खः। सन्ध्या टाइम्सय् थीथी स्वास्थ्य सम्बन्धी च्वसु च्वयादीगुलिं हे वय्कःयात यलया मांभाय् पुचःपाखें ११२५ सालया धर्मादित्य धर्माचार्य सिरपाः लःल्हाःगु खः ।

२०२० सालं सरकारी जागिर शुरु यानादीम्ह डा. तुल्सीनारायण श्रेष्ठं २०५० सालय् सरकारी जागिरं निबृत्त जुइधुंकाः हाकनं च्वयेगुली अप्वः ई बियादिल। उगु अवधि दुने वय्कलं देशया थीथी जिल्ला ओखलढुंगा, जाजरकोट नापं तसकं दुर्गम जिल्लाय् नं डाक्टर जुयाः सेवा यानादिल। उगु इलय् धाःसा म्हो हे जक नेपालभाषां च्वयादिल। झिंन्यादँ तक स्वनिगलं पिने हे ज्या यायेधुंकूम्ह वय्कलं थीथी थासय् थीथी कथंया अनुभव नं हासिल यानादिल। आः धाःसा सुथय् छक्वः मोडेल अस्पतालय् उपचार सेवाय् संलग्न जुइधुंकाः न्हिनय् घौ पलख फुर्सद पिकयाः भाषा, साहित्य व सफू अध्ययन यायेगु व च्वयेगु ज्याय् संलग्न जुयाच्वनादीगु दु। २०१६/१७ सालपाखे प्याखं च्वयाः उकी थम्हं नं कलाकार कथं अभिनय यानादीधुंकूम्ह वय्कलं ताः ई हे प्याखं च्वयेगु म्हितेगु स्यनेगु नापं यानादिल। चिनाखँ, बाखं, स्वास्थ्य सम्बन्धी च्वसु नापं उपन्यास विधाय् नं ल्हाः न्ह्याकाच्वनादीम्ह वय्कः बहनी बंगलामुखी क्लिनिकय् थ्यनेधुंकी। अथे खःसां थः जहान, स्वम्ह काय व भौपाखें माःगु ग्वाहालि जुयाच्वंगु व निम्ह म्ह्याय्या नं छेँ जुइधुंकूगुलिं वय्कः लय्ताः ।

More Stories Like this