थुगुसी फि नं मी हल

मोहनि व स्वन्ति नखः थ्यंकः वयेवं बजारय् हुल हुल यानाः मोहनियात माःगु थीथी ज्वलं न्याये मी याइगु ला झीसं खनाच्वनागु हे जुल। तर थुगुसी धाःसा मोहनिया छता न्हूगु ज्वलं नं बजारय् मी हःगु स्वये दत, व खः नःलास्वां पीगु फि। नःलास्वां पीत माःगु फि खास यानाः खुसिइ वनाः कया हयेमाःगु खः। तर थौंकन्हय् खुसि सुनावंगुलिं अन फि कायेगु सम्भव हे मंत। फिया थ्वहे समस्यायात ध्यानय् तयाः जुइमाः, थुगुसी येँया थीथी थासय् नःलास्वां पीगु फि नापं खःमुली तयाः मी हःगु खने दत ।

अथे हे फि मीत च्वनाच्वंम्ह छम्ह बन्जाः खः अनिता प्रजापति। वय्कलं थथे नःलास्वां पीत फि मियाच्वंगु स्वदँ दत। ख्वपया मनहरा खुसिया फि हयाः येँया असनय् मीगु खः। स्वदँ न्ह्यः थः अबुलिसे चाभारा ज्वनाः असं लागा चाःहिउबलय् थन फि नं मी हःसां जिउ धइगु बिचाः वय्कःया न्ह्यपुइ लाःगु जुयाच्वन ।

नःलास्वां पीगु थ्व फिया भाः थुलि हे धइगु मदु। छझोलाया झितकांनिसें च्वय् न्ह्याक्व नं कायेफु। मनहरां हयागु धायेवं थम्हं हयागु फि अझ चूगु खँ वय्कलं कनादिल। येँया विष्णुमती, बागमती थेंज्याःगु खुसिइ फि मदया वंगुलिं थथे बजारय् फि मीपिं नं अप्वःगु खः। फि मीपिंसं न्यागू किलो फिया स्वीतका, छगू किलोया न्यातकांनिसें झितका तक कायेगु यानाच्वंगु दु। अझ गनं ला चायागु भाराय् हे फि जायेकाः मीगु नं यानाच्वंगु खने दत। फि सहितया छगः भ्यगःया सछि तका ।

असं दुवातय् अप्वः धइथें मस्त प्लाष्टिकय् फि तयाः उखें-थुखें चाःचाःहिलाः मियाच्वंगु नं खने दत। धर्मया लागिं माःगु फि हे थथे मीबलय् पाप मलाइ ला धकाः स्थानीय शंकर महर्जनयात न्यनाबलय् वय्कलं धयादिल, 'ज्या यानाः नयेगु पाप मखु। खुयाः नयेगु खःसा धकाः ।'

उमिसं विष्णुमती, टेकू व बागमती सिथं बोरा का बोरा फि हयातःसां धाइबलय् धाःसा मनहरां हे कया हयागु धयाच्वंगु दु ।

मनूतय्त धाःसा सितिं काये दुगु फि तकं थःगु छेँ क्वय् हे थ्यंके हःगुलिं मू पुलेत नं थाकु धाःसा मजू। बरु उगु फिइ तछ्व कःनि ह्वलेबलय् नःलास्वां जकं बुया वइगु खः ला मखुला ।

More Stories Like this