नेकां माओवादी छथाय् च्वनी ?
एमाले मेपिनिगु राष्ट्रिय सरकारय् मवनीगु
येँ (सन्ध्या टाइम्स)/छुं जुयाः वर्तमान प्रधानमन्त्री माधव नेपालया सरकार क्वःदल धाःसा वयां लिपा राष्ट्रिय सहमतिया सरकार हे दयेकूसां उकी एमाले समावेश मजुइगु खँ धाःगु दु। थःपिनि सरकार क्वःथलाः मेगु सरकार दयेकल धाःसा अज्याःगु सरकारयात थःपिंसं छुं हे कथंया ग्वाहालि मयायेगु मनःस्थिति एमालेया सरकार पक्षीय नेतातय्सं तयाच्वंगु खँ सूत्रं धाःगु दु ।
विज्ञ सूत्रं धाः कथं प्रधानमन्त्री माधव नेपालं थौंकन्हय् थःत नापलाः वइपिं थः सतीपिं मनूतय्त थथे हे धायेगु यानाच्वंगु दु ।
माओवादी व कांग्रेस जानाः मोहनि लिपा हे थःगु सरकार क्वःथलेगु धकाः तयारी यानाच्वंगु बारे प्रम नेपाल पूर्ण रुपं जानकार जुयादीगु खँ नं सूत्रं धाःगु दु। वहे कारणं वय्कलं थज्याःगु खँ धायेगु याना च्वनादीगु खः ।
छुं जुयाः वय्कःया सरकार क्वःथलाः न्हूगु सरकार दयेकीगु इलय् यदि एमाले समावेश मजुल धाःसा सरकार ला गठन जुइ तर उगु सरकारया प्रमुख घटक धइपिं कांग्रेस व माओवादी जुइ। माओवादीलिसे जानाः कांग्रेसं सरकार गठन याइगु सम्भावना धाःसा तसकं म्हो जक दु। कांग्रेसं न्ह्याबलें नं छुं नं ज्या याइबलय् उकियात विदेशीतय्सं गय् यानाः स्वइ धकाः ध्यान बीगु याइ। कांग्रेस व माओवादी जक जानाः सरकार गठन यात धाःसा उकियात अमेरिका लगायतया पश्चिमातय्सं मययेकीगु खँयात नं प्रम नेपालं 'नोटिश' यानादीगु खँ सूत्रं धाःगु दु। दकलय् न्हापां ला कांग्रेस व माओवादी जक दुगु सरकार अमेरिकां हे गठन याके मबीगु व छुं जुयाः कांग्रेसं जिद्दी यानाः अज्याःगु सरकार गठन यात धाःसा उकियात सहयोग मयाइगु सम्भावना दुगु विश्लेषण नं प्रम नेपालं यानादीगु दु। थज्याःगु इलय् एमालें विदेशीया सहानुभूति काये खनीगु व संगठन विस्तार याये खनीगु खँ नं धाःगु दु ।
