स्वनिगः सफा तयेगु अभियान सफल जुइमा

नरेशवीर शाक्य

स्वतन्त्रपूर्वक थुखेंउखें जुइ दयेमाःगु व देय्या प्रत्येक नागरिक शान्तपूर्वक म्वाये दयेमाःगु आधारभूत अधिकार प्रत्येक नागरिकया दयेमाः । झिंनिदँ मयाक जनयुद्धय् होमय् जुयाः मुलुकय् वःगु शान्तिं अनेक ध्वः कियावंगु दु । विशेष रुपं स्वनिगः दुने अप्वःगु आप्रवासनया समस्यां ब्वलंकूगु अस्तब्यस्ततां स्वनिगःवासीतय्गु न्हियान्हिथंया जीवन हे कष्टकर याना बिउगु खँय् शंका मदु । पिनें वःपिं मनूतय्गु ल्याः अप्वयाः थनया मौलिक पूर्वाधार व सांस्कृतिक एवं पौराणिक धरोहरत तकं विनाश जुयावंगु खँय् स्वनिगःवासीत अत्यन्त चिन्तित जुयाच्वंगु दु ।

मुलुकय् राजनैतिक परिवर्तन वयेधुंकाः राज्य सरकारं दकलय् मयासें मगाःगु आमनागरिकया शान्तिपूर्ण जीवनया ब्यवस्थापन खः । थन दयाच्वंगु अराजकतायात चीकाः सरकारया उपस्थिति क्यनेगु खः । बिधिया शासन अनुभव मजुयाच्वंगु सन्दर्भय् आः सरकारं थीथी पलाः ल्ह्वनाः थनया जनजीवनयात ब्यवस्थित यायेगु कुतः च्वछायेबह जू । रात्री ब्यवसायया कारणं ब्वलनाच्वंगु अराजकतायात चीकाः आम मनूतय्त मुलुकय् सहज वातावरण दु धयागु आभास बीत सरकार सक्षम जूगु दु । थ्व हे सन्दर्भय् आः गृह मन्त्रालय न्ह्यलुवा जुयाः थनया अब्यवस्थित फुटपाथ बजाः चीकेगु अभियानयात नं उकथं हे लसकुस यायेबहः जू । थ्व ज्याझ्वःयात अभियानकथं न्ह्याकाः प्रहरी प्रशासन व महानगरपालिकाया कुतः सफल यानाः येँ देय्यात बांलाःगु शहरकथं बिश्वय् म्हसीका बीत सफल जुइमाःगु दु । फुटपाथ बजार न्ह्याबलें हे समस्याया कारण जुयाच्वंगु दु ।

आः दयाच्वंगु अनियन्त्रित फुटपाथ बजारया कारणं मनूत न्यासि वनेत दयेका तःगु थासं न्यासिवने मदयाः बाध्य जुयाः हे सतकं न्यासि वनेमाःगु स्थिति ब्वलनाच्वंगु खः । थुिकं यानाः यातायात दुर्घटनाया कारणं मनूतय्गु ज्यान तकं वनेगु ज्या जुयाच्वंगु परिपे्रक्षय् आः फुटपाथ खुल्ला जुइमाः धयागु मान्यता यातायात ब्यवस्थापन याईपं ट्राफिक प्रहरीतय्सं यानाहःगु खः । फुटपाथं जुइमाःपिं मनूत सतकं न्यासि वनेवं यातायात साचालनय् अवरोध वयाः गाडी जाम जुइगु समस्या थौंकन्हय् सकसिनं सह याये मालाच्वंगु खः ।

फुटपाथ ब्यवसायया कारणं प्यखेरं समस्या ब्वलना वयाच्वंगु दु । फुटपाथय् सामान कम भावं लाइ धयागु मान्यता गलत खः । कम दामं लाइगु सामानया गुणस्तर नं तसकं कम जुयाच्वनीगु वा स्यंगु जुयाच्वनीगु सामान्य खँ खः । थुकथं फुटपाथ बजारं उपभोक्तायात नं फाइदा जुइगु मयाः । फुटपाथ अब्यवस्थित जुइगु कारणं मनूत स्वतन्त्रपूर्वक वये वनेत जक पंगः जुइगु मखुसें उमिसं थःपिनिगु पसःयात सुरक्षित यायेगु नामय् याइगु ज्यां शहर कुरुप जुयाः जुइगु व शहर झन हे फोहोर जुइगु कारणं थुज्वःगु ज्यायात प्रोत्साहन जुइ मजिउगु खँय् विवाद मदु ।

फुटपाथ ब्यापारीत छुं नं सरकारी करया दायरा दुने मलाइगु कारणं थुिकं राजस्व संकलनय् नं प्रत्यक्ष प्रभाव लानाच्वंगु दु । थुमिसं पसःया बाः पुलेम्वाःगु व सरकारी कर नं पुलेम्वाःगु कारण थुमिसं सामान दंक बी धयागु छगू भ्रम जक खः थज्याःगु ब्यवसायया प्रोत्साहनं करया दायराय् दुिपं व बाः पुलेमाःपिं ब्यापारीत तसकं मारय् लानाच्वंगु दावी पसःथुवाःतय्गु दु ।

थीथी कारणं विस्थापित जुयाः राजधानीइ च्वनाच्वंिपं मनूतय्गु ल्हाःम्हुतु चूलाकेगु ज्वलं लाका काये मजिउ धयागु मान्यतां आःया फुटपाथ चीकेगु ज्याय् फुटपाथ ब्यापारीतय्सं अवरोध प्वंकाच्वंगु दु । मानवीय दृष्टिकोणं थ्व खँ पाय्छि जुइफु तर थज्याःगु ज्यां ब्यक्तियात फाइदा जूसां समाजय् नकारात्मक लिच्वः लानाच्वंगु दु । अझ स्वनिगःवासीतय्गु निंतिं थ्व अभिशाप कथं हे खने दयाच्वंगु दु । फुटपाथ बजाः अनियन्त्रित व अब्यवस्थित जुयाः छगू इलय् न्यूरोड जःखःया स्थानीय मनूत थः हे कुहां वयाः फुटपाथ बजाः चीकूगु खँ पुलां मजूनि । उकिया सफलताकथं आः तक न्यूरोड फुटपाथ बजाःबिहिन जुयाः अन मनूत याउँक वये वने यानाच्वंगु दु ।

फुटपाथ बजाःया मू कारक थीथी जिल्लां स्वनिगः दुने वयाः थःपिनि रोजीरोटी मालेत वयाच्वंपिं मनूत हे खः । स्थानीय- वासीतय्गु थःपिनि हे छेँ बुँ दइगु कारणं उमिसं फुटपाथय् तयेम्वाः । फुटपाथय् पसः तईपंसं आः सरकारं उमित वैकल्पिक थाय् बीमाः धइगु माग यानाः आन्दोलन यायेगु ख्याच्वः नं बियाच्वंगु दु । थ्व मागयात राजनैतिक रंग बियाः थीथी राज- नैतिक पार्टीतय्सं थ्व मागयात समर्थन यानाः फुटपाथ ब्यापारीतय्त थःगु पार्टीया समर्थक दयेकेगु कुतः जुइ मजिउ । वैकल्पिक थाय् बीवं फुटपाथ ब्यापारीत अन च्वं वनी मखु । च्वं हे वन धाःसां अन ब्यापार मदु धकाः हाकनं फुटपाथ अतिक्रमण शुरु याः वइ वा फुटपाथ खाली जुइवं हे अन च्वं वईपं मेपिं फुटपाथ ब्यापारी स्वतः हे ब्वलना वइ । थ्व कारणं आः सरकारं न्ह्याकाच्वंगु फुटपाथ चीकेगु अभियानयात सकल स्वनिगः- वासीतय्सं समर्थन यानाः थुकियात सफल यायेमाःगु खनेदु । फुटपाथं न्ह्याबलेंया िनंति ब्यवसायीत चीकेगु निंतिं कडा कानून व सजाँयया ब्यवस्था यायेफत धाःसा जक थ्व अभियान सफल जुइ ।

उकथं हे फुटपाथय् पसः तयाः ब्यवसायया मौका चूमलात धायेवं पिनें वयाच्वंिपं मनूत वैकल्पिक ब्यवसायय् संलग्न जुयाः मुलुकयात अझं फाइदा जुइ फइ कथंया छुं लिच्वः पिदने फइगु खँ दुसा उकियात कयाः झी सकसिनं ध्यान बियाः स्वयेमाःगु दु ।

More Stories Like this