मोहनि लिपा हे न्हूगु सरकार
डा. भट्टराई प्रधानमन्त्री जुइगु सम्भावना
येँ (सन्ध्या टाइम्स)/सम्भवतः मोहनि लिपा हे माधव नेपालया सरकार क्वःदल धाःसा अजू चायेमाःगु विषय मजुइफु। थुकिया निंतिं माओवादीपाखें कांग्रेस सभापति गिरिजाप्रसाद कोइराला लगायत मेगु चीधंगु दलतलिसे जानाः माःगु तयारी याना तयेधुंकूगु खँ विज्ञ सूत्रं धाःगु दु ।
सूत्रया कथं आः गठन जुइगु सरकारया नेतृत्व माओवादी नेता डा. बाबुराम भट्टराईनं यानादीगु नं उतिकं सम्भावना दु। भावी प्रधानमन्त्रीया रुपय् माओवादी अध्यक्ष प्रचण्डं हे डा. भट्टराईया नां न्ह्यःने हयाच्वंगु दावी नं सूत्रं याःगु दु।
नेपालय् न्ह्यागु सरकार वयेत नं भारतया समर्थन मदयेक मगाः, यदि भट्टराई प्रधानमन्त्री जुल धाःसा वय्कःया थःगु हे च्यानलं भारतयात नं 'ब्यालेन्स'य् तये फइगु खँ सूत्रं धाःगु दु ।
छुं जुयाः भट्टराई प्रधानमन्त्री जुइगु स्थिति मंत धाःसा कांग्रेसयाम्ह हे छम्हेसित प्रधानमन्त्री दयेकाः जूसां माओवादी न्ह्यःने वनीगु दावी नं सूत्रया दु। अज्याःगु अवस्थाय् प्रधानमन्त्री जुइत नेकां सभापति गिरिजाप्रसाद कोइराला थः हे नं अझं तयार जुयाच्वंगु खँ नं सूत्रं धाःगु दु। थौंकन्हय् कोइरालां 'माधव नेपालं नं मफइ थें च्वन। वय्कलं माओवादीयात नं सरकारय् हये मफुत। बरु जि जूसा फुकस्यां समर्थन याइगु जुइ' धकाः बिचाः बीगु यानाच्वंगु कारणं वय्कः अझ नं सरकारया नेतृत्व यायेत तयार जुयाच्वंगु विश्लेषण सूत्रं याःगु खः । थ्व नितां अवस्थाय् कोइरालाया म्ह्याय् सुजाता कोइरालायात बांलाःगु अवसर वइगु दावी नं सूत्रं याःगु दु।
माधव नेपालया सरकार क्वःथलाः न्हूगु सरकार दयेकेगु लागिं माओवादीं मेमेगु दलतलिसे नं खँल्हाबल्हा न्ह्याकाच्वंगु दु। थ्वहे प्रयोजनया निंतिं उपेन्द्र यादवया मधेशी जनअधिकार फोरमं विजय गच्छेदारया फोरम (लोकतान्त्रिक) या मन्त्री जुइमखंपिं सभासद्तय्त गोप्य रुपं नापलानाः थःथाय् वयेत इनाप यानाच्वंगु खँ नं सूत्रं धाःगु दु ।
प्रम नेपालया अमेरिका भ्रमण लिपा हे सरकार क्वःथलेगु कासा तीव्र रुपं न्ह्याये फइगु खँ नं विज्ञ सूत्रं धाःगु दु ।
