कांग्रेसं तयार याःगु संघीय स्वरुप

राज्य पुनर्संरचना सम्बन्धी थःगु आधिकारिक धापू पित बीत थाकुकाच्वंगु नेपाली कांग्रेसं नं अन्ततः माओवादी व एमालें हयाच्वंगु बिचाःलिसे हे ज्वः लाइ कथंया खाका तयार याःगु संकेत वःगु दु। संघीय नेपालय् न्हापा न्यागू विकास क्षेत्र कथं न्यागू जक प्रान्त तयेगु धइगु बिचाः हयाच्वंगु कांग्रेसं आः १६ गू प्रान्त दयेकेमाः धइगु न्हूगु बिचाः पित हःगु दु। थ्व स्वयां न्ह्यः तःधंगु पार्टीत मध्ये एनेकपा (माओवादी) व नेकपा (एमालें) जक थथे तःगू प्रान्त सहितया संघीय नेपाः दयेकेगु प्रस्ताव न्ह्यःने हयाच्वंगु खः ।

माओवादीं शुरुंनिसें हे जातीय लिधंसाय् प्रदेशत निर्माण जुइमाः धकाः स्पष्ट बिचाः तया वयाच्वंगु खःसां एमालें धाःसा आः नकतिनि हे जक जातीय आधार नं कःघाइ कथंया प्रदेश दयेकेमाःगु प्रस्ताव तयार याःगु दु। एमालें आः वयाः तयार याःगु राज्य व्यवस्था सम्बन्धी अवधारणा न्हापा स्वयां यक्व परिमार्जित जुइधुंकूगु दु। आः कांग्रेसं तयार याःगु अवधारणा नं करिब अथे हे च्वंसां उकिया आधार धाःसा जाति भाषा हे जुइ वा मेगु हे जुइ धइगु खँ धाःसा स्पष्ट मजूनि। अथे खःसां १६ गू प्रान्त दयेकीबलय् उकी जाति भाषाया बाहुल्यता हे प्रमुख जुइगु खँय् शंका मदु। प्रान्तया नां जातीय आधारय् मतःसां उकिया स्वरुप व संरचना धाःसा जातीय आधारय् हे निर्माण जुइगु संकेत खनेदु। नेपालय् संघीय व्यवस्थाया वकालत याना वयाच्वंपिं आदिवासी जनजातित खः। उकिं आः निर्माण जुइगु संघीय व्यवस्थाय् जातीय भाषिक आधारयात हे त्वःफिकेगु खःसा उकिं सार्थकता काये मफइगु खँयात नं झीसं लुमंकेमाः ।

More Stories Like this