सिकाली जात्राया टिकट शो

मोहनि शुरु जुल। मोहनियात नेपाःया राष्ट्रिय नखः तक नं धाः। तर यलया ख्वनाय् धाःसा मोहनि हनी मखु। मोहनि नखः महनेगु हे ख्वनाया विशेषता खः। नेवाःतय् छेँय् मनू सिनाः दुःखं हे क्यंसां तबि नं नःलास्वां छता पी हे माः धाइ। तर ख्वनाय् नःलास्वां नं पी मखु। द्यःयात माः धकाः द्यःछेँ छथाय् धाःसा पी, सर्वसाधारणं पी मखु ।

बरु उकिया पलेसा मोहनिजःछि अन सिकाली (श्रीकाली) द्यःया जात्रा जुइ। सिकाली द्यःया जात्रा धाल कि यल देसय् हे नां जाः। आः थ्व नांजाःगु जात्रायात यल पिने च्वंपिं नेपाःमि व गैरनेपाःमितय् दथुइ नं थ्यंकाः थुकिया प्रवर्द्धन यायेगु ताः तयाः स्थानीय ल्याय्म्हतय्सं थुकिया 'टिकट शो' नं शुरु याःगु दु। सिकाली द्यःया टिकट शो शुरु जूगु ला थगुनेनिसें खः। उकियात थुगुसी नं निरन्तरता बीगु जूगु दु ।

थुगुसी स्थानीय ओसिड-नेपाल नांगु संस्थां थ्व ज्या यायेत्यंगु खः। थुकिया निंतिं संस्थां टिकट नं मीगु शुरु यायेधुंकूगु दु। 'भिजिट श्रीकाली जात्रा - ००९' नां तयाः न्ह्याकूगु थ्व ज्याझ्वः थ्वहे वइगु विहीवाः (असोज ८ गते) जुइत्यंगु खः। थुकी छपाः टिकट न्यात कि जावलाख्यलंनिसें ग्वसाः खलकं हे बसय् तयाः ख्वना तक यंकी। अन हे ब्रेक फास्ट जुइ। जात्रा व ख्वना देय्या बारे छझाः जानकारी बीगु ज्या जुइ। अनं लिपा सिकालीया जात्रा जुइगु थासय् ब्वना यनी। अले जात्रा शुरु जुइ। जात्रा करिब निघौ तक न्ह्याइ। जात्रा लिपा तुच्चा जुइ ।

ग्वसाः खलःया नायः कृष्णशरण डंगोलया कथं थगुने ज्याझ्वः यानाबलय् येँपाखें खुइम्ह ति जक मनूत वःगु खः। थुगुसी उकियात अझ बढे यायेगु ग्वसाः जुयाच्वंगु दु। थुकी खास यानाः आःयात आन्तरिक स्वकुमित हे अप्वः लक्ष्य दयेकागु खःसां विदेशी पर्यटकत नं सालेगु थःपिनि ग्वसाः दुगु खँ वय्कलं कनादी ।

जात्राया ज्याझ्वः दयेकातःगु अतिकं न्ह्यइपुसे च्वं, उकिं स्वकुमित आकर्षित जुइगु नं ग्वसाः खलःया आशा दु।
सिकाली द्यःया जात्रा न्यान्हु तक न्ह्याइ। विहीवाः उकिया छगू कुचा जक क्यनी। झ्वाट्ट स्वयेबलय् थ्व जात्राया व्यवसायीकरण थें च्वनी। तर थुकिं व्यवसायया नापनापं जात्रायात प्रवर्द्धन यायेगु ज्या नं यानाच्वंगु दइ।
न्ह्यसः पिदनी, सार्वजनिक जात्रा क्यनाः दुहां वःगु ध्यबा गन वनी ले ?

खतुं, थ्व ज्याझ्वलं खास हे ध्यबा मुनीगु ला खने मदु, अथे खःसां ग्वसाः खलकं ख्वना देय्या ल्याय्म्हतय्त आर्थिक आय जुइगु थीथी कार्यक्रमय् थ्व ध्यबा छ्यलेगु खँ धाःगु दु।
थथे न्हापांनिसें चले जुया वयाच्वंगु सार्वजनिक जात्रायात टिकट शो क्यनेगु थ्व छगू न्हूगु प्रयोग खः। तर थुकिं जात्रायात लोकंह्वाकेगु, प्रचार यायेगु व आवश्यक जुल धाःसा जात्राया लागिं सुयां न्ह्यःने ल्हाः मफसे थः हे सक्षम जुइगु लँपु नं चायेका बीगु आशा यायेफु ।

More Stories Like this