छेँ छेँय् न:लास्वां पिल, मोहनि नख: न्ह्यात

हिन्दू धर्मालम्बीतय् दकलय् तःधंगु व ताः हाकःगु नखः मोहनि थौं नं निसें न्ह्याःगु दु । थ्व नख: कौलाथ्व पारु निसें पुन्हि तक बाःछि हनी । मोहनि असत्ययात सत्यं त्याकूगु, मनू व द्यःतय्त दुःख बिइपिं दानव, राक्षसतय्त स्यानाः शान्ति सुरक्षा कायम जूगु लसताय् हनीगु नखः खः ।

थुगु नखःया न्हापांगु न्हि थौं छेँ छेँय् सुचुकुचु यानाः पुजा क्वथाय् नःलास्वां पिउगु दु । पुजा क्वथाय् चायागु भ्यगतय् प्यँफुछि निपगु फि वा पँचा वा नितां ल्वाकछयानाः तइ । उकी न्ह्यत खुन्हु फ्वयातःगु तछ्व वा कःनि पिनाः चा प्याक्क नीलः ह्वलाः मेगू भ्यगतं त्वपूइ । त्वपूयाः ख्यूंथाय् ब्वलना वइगु व म्हासुसे च्वनीगुलिं थुगु भ्यगतयात त्वपूयाः ख्यूंथाय् तइ । थुकीयात चालं कुन्हु पुजा यानाः क्वकाइ ।

थौं नं मेमेगू नखःवलय् थें नित्य पुजा यायेधुंकाः त्वाःयाम्ह गणेद्य व मेमेपिं द्येगलय् नापं आगंछेँय् आगंद्यः थाय् देय्के वनीगु चलन दु ।

शरद ऋतु जूगुलिं मज्जां फय् वइगुलिं थ्व न्हि कुन्हु न्ह्यइपुक्क भुतुमालि ब्वयेकी । भुतुमालि ब्वयेकाः इन्द्रयात वा वयेके म्वाःल गात धकाः सूचं बिइगु धाइ ।

More Stories Like this