मन्त्रीत स्यंगुलिं कांग्रेस चिन्तित
स्यंपिं मन्त्रीतय्के थौं स्पष्टीकरण काइगु
येँ (सन्ध्या टाइम्स)/न्ह्यःने वयाच्वंगु नेपाली कांग्रेसया महाधिवेशनय् छ्यलेमाः धकाः कांग्रेसया मन्त्रीतय्सं थौंकन्हय् थीथी व्यापारीतय्के ध्यबा म्हयाच्वंगु रिपोर्ट पार्टीइ वयेवं थौं कांग्रेसं थःगु पार्टीया फुक्क मन्त्रीतय्त पार्टी ज्याकुथी सःताः स्पष्टीकरण काइगु जूगु दु ।
नेपाली कांग्रेसया म्हिगः च्वंगु केन्द्रीय समितिया बैठकय् थ्व बारे खँ वःगु खःसा उकियात कयाः सहलह लिपा थौं मन्त्रीतय्के स्पष्टीकरण कायेत्यंगु खः ।
लिसें थौं मन्त्रीतय्सं सरकारय् वनाः नं अपेक्षित भूमिका म्हिते मफुगु बारे नं मन्त्रीतय्के स्पष्टीकरण काइगु खँ कांग्रेस स्रोतं धाःगु दु ।
अथे हे कांग्रेसया मन्त्रीत पार्टीमुखी मजुसे व्यक्तिमुखी जुया वनाच्वंगु व मन्त्रीतय् भूमिका सन्तोषजनक मजूगु खँय् थौं स्पष्टीकरण कायेगु तयारी जुयाच्वंगु खँ धाःगु दु ।
अथे हे थौं च्वनीगु केन्द्रीय समितिया बैठकय् महासमितिया बैठक स्थगित यायेत पार्टी सभापति गिरिजाप्रसाद कोइरालां बिउगु निर्देशनयात कयाः नं सहलह जुइगु खँ धाःगु दु।
कांग्रेस केन्द्रीय समितिं थ्वहे कार्तिक महासमितिया बैठक सःतेगु निर्णय याःगु खःसा सभापति कोइरालां महासमितिया बैठकया निंतिं ई मगाःगु धासें बैठक स्थगित यायेत निर्देशन बिउगु खः। सभापति कोइरालां बैठक स्थगित यायेत हाकनं दवाव बीवं सभापति कोइराला व पार्टीया केन्द्रीय दुजःतय् दथुइ विवाद नं तच्वया वंगु खँ कांग्रेस स्रोतं धाःगु दु।
कांग्रेस दुने विधान संशोधन यानाः सभापतिया शक्ति कमजोर यायेगु कुतः जुयाच्वंगु धासें कोइरालां विधान संशोधनयात कयाः विरोध याना वयाच्वंगु खःसा मेपिं केन्द्रीय दुजःतय्सं पार्टीयात लोकतान्त्रिक यायेगु निंतिं नं विधान संशोधनया आवश्यकता जूगु धासें विधान संशोधन यायेत माग याना वयाच्वंगु खः ।
केन्द्रीय समितिया बैठकय् सभापति कोइरालाया निर्णय अन्तिम जुइगु यानाच्वंगुलिं गुलिखे असन्तुष्ट केन्द्रीय दुजःतय्सं उकिया विरोध याना वयाच्वंगु खः। कांग्रेसं राज्य पुनर्संरचना सम्बन्धी प्रतिवेदनय् नं सहलह याइगु खँ दु ।
