समावेशीकरण मजूगु राजदूत नियुक्ति

सरकारं थीथी देशया राजदूत दयेकाः छ्वयेगु लागिं सिफारिस याःगु नां समावेशी मजुल धइगु कारण क्यनाः प्यंगू मधेशवादी दलतय्सं राजदूत सुनुवाई ज्याझ्वः हे बहिष्कार याःगु दु। देय्या हरेक ख्यलय् समावेशीकरण जुइमाःगु माग थ्वयाच्वंगु थौंया इलय् राज्य सत्ताय् च्वंपिंसं उकियात पटक्क हे ध्यान मबिसे थः आसेपासेतय्त राजदूत दयेकेगु ज्या याःगु कारणं नं थ्व समस्या वःगु खः। राज्यया फुक्क अंगय् आः राज्यपाखें समावेशीकरणया सिद्धान्तयात ध्यानय् तयाः ज्या यायेगु धकाः संविधानय् हे उल्लेख यायेधुंकाः नं सरकारय् वंपिंसं उकियात वेवास्ता यानाः छगू जक जातिया मनूतय्त नियुक्त यायेगु ज्यां द्वन्द्व ब्वलनीगु स्वाभाविक खः ।

थौंकन्हय् मधेशवादी राजनीतिक पार्टीत शक्तिशाली जुयाच्वंगु कारणं उमिसं थुकियात कडा रुपं न्ह्यःने हयाच्वंगु दु। नकतिनि राजदूत नियक्तिया ज्यायात नं उमिसं हे विरोध याःगु खः। तर मधेशवादी दलतय्सं समावेशीकरण मजू धकाः उकियात सुधार यायेगु नामय् मधेशीकरण यायेगु ज्या धाःसा याये मजिउ। अन मधेशी लगायत जनजाति, दलित, मिसा आदि समुदाययात दुथ्याकेगु खँयात न्ह्यःने हयेमाः। राज्य न्हापांनिसें छगू जातिया दवाव व दमन फयाः सञ्चालन जुयाच्वंगु दु। उकियात हे मदयेकेगु लागिं राज्य पुनर्संरचना व समावेशीकरण थेंज्याःगु पलाः न्ह्याकेमाःगु खः। तर राजनीतिक पार्टीतय्सं थुकियात अझ नं ध्यान मबिउनि। राजदूत लगायत अन्य नियुक्तिइ पार्टी व सरकारं थुकियात ल्वःमंके मजिउ ।

More Stories Like this