राजदूत सुनुवाई बहिष्कार

सिफारिश समावेशी मजूगु मधेशवादीतय् द्वपं

येँ (सन्ध्या टाइम्स)/सरकारं आः नकतिनि प्यंगू देय्या राजदूत नियुक्त याःगुलिं फुक्कं छगू हे जातियापिं खने दयाः समावेशी मजुल धासें थौं जुइमाःगु राजदूततय् सुनुवाई ज्याझ्वः प्यंगू मधेशवादी दलतय्सं बहिष्कार यात। संसदीय सुनुवाई समितिया दुजः जुयाच्वंपिं मधेशवादी दलया सभासद्तय्सं सुनुवाई बहिष्कार याःगुलिं थौं जुइमाःगु ज्याझ्वः हे स्थगित यायेमाल ।

सरकारं संयुक्त राष्ट्र संघया स्थायी समिति दुजःया निंतिं ज्ञानचन्द्र आचार्य व ब्राजिलया राजदूतया निंतिं अरुण धितालया नां सिफारिस याःगु खः। थुकियात चीधंगु दलया सभासद्तय्सं समावेशी मजूगु सिफारिस धकाः विरोध यासें थौं क्वःछिनातःगु उमिगु सुनुवाई ज्यायात बहिष्कार याःगु खः ।

न्हापा न्हापा नं थीथी देशय् राजदूत नियुक्ति यायेगु झ्वलय् आदिवासी जनजाति, मधेशी लगायत अल्पसंख्यक समुदायया प्रतिनिधित्व मजू धासें विरोध जुया वयाच्वंगु खः ।

थौंया सुनुवाई ज्याझ्वःयात मधेशी जन अधिकार फोरम, तराई मधेश लोकतान्त्रिक पार्टी, दलित जनजाति दल व संघीय लोकतान्त्रिक मञ्चं थ्व बहिष्कार याःगु खः।
राजदूतया सिफारिस समावेशी मजुल धकाः राजनीतिक पार्टीतय्सं छुं नं ज्याझ्वः बहिष्कार याःगु थ्वहे न्हापांखुसी खः ।

प्यंगू दलया सभासद्तय्सं सुनुवाई बहिष्कार याःगुलिं लिपा राजदूत नियुक्तिया ज्या समावेशी रुपं जुइमाः उकिं सिफारिस नं उकथं हे यायेमाः धकाः परराष्ट्र मन्त्रालययात पौ च्वयेगु निर्णय जूगु खः। परराष्ट्र मन्त्रालययात थ्व बारे पौ च्वयेगु सहमति जुइवं तिनि सुनुवाई ज्याय् थःपिं हानं च्वनेगु खँ बहिष्कारवादी दलतय्सं धाःगु दु। आः थौं जुइ मफुगु सुनुवाई ज्याझ्वः आइतवाः याइगु जूगु दु ।

लुमंकेबहः जू, न्हापा गिरिजा प्रसाद कोइराला प्रधानमन्त्री जुयाच्वंगु इलय् नं राजदूत नियुक्त जूपिं सकलें ब्रम्हू जातियापिं जक लाःगु खँयात कयाः सर्वोच्च नेता गणेशमान सिंहं 'पार्टी दुने बाहुनवाद हावी जूगु' धकाः न्हापांखुसी टिप्पणी यानादीगु खः। आः देशय् गणतन्त्र वयेधुंकाः नं हानं वहे व्यवहार लिसा काःगु बिचाः थन प्वंकाहःगु दु ।