गिरिजा प्रसादं मिखां धरधर ख्वबि हाय्कल…

नर्मदेश्वर प्रधान

थ्व जोक मखु । गफ । ध्वाँस नं मखु । फय्गँ नं मखु । धाथेंगु घटना खः । छिं न्यने फु छं थ्व गय् सिल । छिगु न्ह्यसः मनासिव । थ्व घटना जिगु तप्यंगु अनुभव मखु । एक कान दुई कान जुयाः जि थाय् थ्यंगु खः । थौं जिं थ्वइत मैदानय् त्वःते त्यना ।

गिरिजां धरधर मिखां ख्वबि हायेकूगु घटना । कुं पालुया वा मल्ता वान्याना मखु । नुगः मिछंकाः ख्वःया । छिकिपं अजू चायेफइ । गिरिजा थज्याःम्ह नँध्याग । गय् ख्वबि हायेकल जुइ वं नुगः मिछंकाः । थ्व असम्भव तर अथे मखु । गबलें गबलें असम्भव नं सम्भव जुइ यः खनी । का न्यनादिसं ।

गिरिजां मिखां धरधर ख्वबि हायेकूगु नुगः मिछंकाः । थ्व झी न्यनीबलय् न्यनामिपिसं अनुमान यायेफु शायद थ्व गिरिजाया अबु सीबलय् मां सीबलय् वा कला सीबलय्या घटना खँ जुइमाः । तर मखु । मां अबु कलाः सीबलय् गिरीजा गुलि ख्वल जिं सुपाखें न्यनागु मदु । उकुन्हु गिरीजाया तताजु मदुबलय् छकः टिभी गिरीजां रुमालं मिखा हुउगु धाःसां जिं खना । शायद व ख्वय् भाय् याःगु खः ला जिं थुकिया अर्थ छ्याये मफु । गिरीजा ख्वःगु मसिउ । गिरीजां ख्वयेकूगु सिउ धाईपं धाःसा यक्व दु । लौहपुरुष गणेशमानयात गिरीजां ख्वयेका बिल । थथे धाईपं दु । भाजु कृष्णप्रसाद भट्टराईज्यू प्रधानमन्त्री जूबलय् गिरिजां वइत कुतिं जक न्यानाः ख्वये ला न्हिले ला यानाबिल । मनूतय्सं लुमंका च्वनी । भाजु मन-मोहनयात ला अस्पतालय् च्वंम्हेसित हे ख्वयेका बिल । शेरबहादुरयात ला ककू तियाः हे ख्वयेकूगु खः । गिरिजा याके ख्वयेकेगु वल मन्त्र दु । हारांचा खनाः नारांचा ग्याः । गिरिजा हारां खनाः मग्याःम्ह सु नारां दइ । उज्यःम्ह नुगः बल्लाःम्ह ल्वहंंयाथें नुगः दुम्ह गिरीजा गये ख्वल जुइ । सुना ख्वयेकल जुइ वइत धाथें मखुगु खँ थें जुइ गिरिजां मिखां ख्वबि हायेकूगु खँ ।

तर उखुन्हु गिरिजा खूब ख्वल । वं मिखां धरधर ख्वबि हायेकल । वं नं मचाः । गुलिस्यां न्यन छाय् ख्वया दियागु वं लिसः मबिउ । जाभू न्ह्यःने तयाः मिखां ख्वबि मदिक्क हायेका च्वन । जाः न्ह्यच्याना च्वन । नःगु धाःसा मखु । न्हक्कु तियाः मौन जुयाच्वन । थौं गिरिजाया भारा सिलेगु पाः । जा थुइगु पाः मेपिनि । उखुन्हु सुथय् जाः माय्केँ प्वाते तर्कारी । ईपं न्याम्हेस्त ज्वनाः अन तये हल । थ्व २०१७ सालया खँ खः । जा थुइगु लः कायेगु भार सिलेगु न्याम्ह वन्दीत दथुइ पालंपाः । थ्व भट्टगोल जेल मखु । छगू स्थानीय महल । महलय् । कूंचाय् । पन्जलय् थें । नयेगु द्यनेगु व्यवस्था दु । तर पिहां वयेगु बन्द थःथिति बाहेक सु नाप लाये मदु ।

उखुन्हु गिरिजां जा नं हे मनः । जाभू न्ह्यःने तयाः मिखां ख्वबि हायेकी । दश पन्द्र मिनेत नं न्वमवासे अथे हे च्वनी । तपस्या याये थें । अले ल्हाःसिलाः द्यं वनी । पासापिनि दथुइ खाशखुश खँ जुइ । गिरिजां छाय् जा मनःगु छाय् मिखां ख्वबि धरधर हायेकूगु वइके सुनां नं हय् कयाः न्यने छाःगु मखु । पासापिनि नुगः शान्त मजू । छन्हु निन्हू लिपा । थ्व खँ फासफुस जुयावन । गिरिजा न्हापालिया थें हे नर्मल जुइ । छन्हू गिरिजाया मां बन्दी महलय् काय गिरिजा नापला वइ । लिहां वने त्ययेकाः गिरिजाया मामं पासापिनि पुचलय् वयाः धाइ बाबुपिं छिकिपंत छता खँ धाय्… गिरीजायात प्वाते तर्कारी तया बी मते छिकपिसं । प्याते तर्कारी वया शत्रु । प्वाते तर्कारी खनकि वया मिखा ख्विबं धरधर हायेधुंकी । उिकं बाबुपिसं थ्व खँ छता लुमंका तया ती । गिरिजाया मांया इनाप न्यनाः मेपिं सहबन्दीत फुकस्यां न्हलं चाः थें जुइ । उखुन्हु गिरिजा ख्वःगुया कारण उमिसं सीकी । गिरिजा थज्याःम्ह छाः नुगःयात जावा प्वाते तर्कारी ख्वयेका बिल । नायेका बिल । छखेर गिरिजाया थ्व खँ न्यने । जितः मखेर प्वाते नानी लुमना वइ । ठीक गिरिजाया अःखः । प्वाते नानीया प्वाते धालकि प्राण थें । सिक्क हे यः वइत प्वाते तर्कारी । प्वाते तर्कारी दु खुन्हु व न्हिली । वं जा छक्ख नइ । वइत सकस्यां प्वाते नानी धाइ । प्वाते तर्कारी यःम्ह जूगुिलं वइत अथे धाइगु खः । मती वयाच्वनी । धाथें गिरिजायात प्वाते नानी श्रीमती लाःसा छु यायेगु लः वः मिं थें जुइ । छम्ह प्वाते खन कि मिखां ख्वबि हायेकीम्ह । मेम्ह प्वाते धालकि मुसुमुसु न्हिलीम्ह । धाथें ईपं ज्वः जूगु जूसा गिरिजां जाभू न्ह्यःने तयाः गुलि ख्वबि धरधर हायेके मालीगु जुइ वया गुलि प्वाः द्यांलाइगु जुइ… गिरिजा सुकूचिनीगु जुइ । अले धाथें थौंया नेपाःया इतिहास हे पाइगु जुइ … ।

More Stories Like this