देशय् वःगु हिउपाः व मदुम्ह लक्ष्मण अर्याल

देय्या वर्तमान अन्तरिम संविधान च्वयेगु ज्याया नेतृत्व यानादीम्ह संविधानविद् लक्ष्मण अर्याल मंत। देशय् अग्रगामी चरित्रया न्हूगु संविधान च्वयेगु ज्या जुयाच्वंगु हे इलय् थुकिया लागिं मदयेक मगाःम्ह वय्कः थेंज्याःम्ह व्यक्तित्व मदुगु अवश्य नं तःधंगु क्षति खः। सम्भवतः संविधान च्वयेगु ज्याय् इलय् ब्यलय् वइगु पंगःया इलय् अवश्य नं वय्कःयात सकस्यां लुमंकी जुइ ।

देशय् जनआन्दोलन-२ पाखें थौंया हिउपाः हयेगु ज्याय् वय्कःया नं तःधंगु भूमिका दु। तर देशय् हिउपाः वयेधुंकाः राजनीतिक पार्टीतय्सं थ्व हिउपाःयात गुलि विकृत दयेका बिल धइगु खँया छगू ज्वलन्त दसु धाःसा वय्कः स्वयम् खः। आन्दोलन क्वचायेकाः संविधानसभाया चुनाव ताकाय् न्हूगु संविधानसभाया अध्यक्ष पदय् वय्कःयात हे हयेगु धकाः चर्चा जुयाच्वंगु खः। उकिया निंतिं वय्कः नं मानसिक रुपं तयार जुयादीगु खः। यदि संविधानसभाया अध्यक्ष मखुसा संविधान च्वयेगु ज्याया गुगुं नं छगू महत्वपूर्ण जिम्मा (सम्भवतः संवैधानिक समितिया अध्यक्ष) वय्कःयात बीगु तकया खँ दुगु खः। तर राजनीतिक पार्टीतय्सं पद फुक्क थःपिनि भागबन्डाया विषय दयेकाः इनाः नःगु कारणं वय्कः थेंज्याःपिं संविधानया विशेषज्ञत संविधान च्वयेगु ज्यां पूर्ण रुपं पिने लाः वन। सखे उकिया हे लिच्वः जुइमाः थौं देशय् संविधान च्वयेगु ज्या फिटिक्क हे न्ह्याः वने फयाच्वंगु मदु। संविधान दयेकेगु ज्या संविधानविद्तय्गु मखुसें पार्टीया कार्यकर्तातय्गु जुयाच्वन धइगु खँ लक्ष्मण अर्यालया नियतिं क्यनाच्वंगु दु। उकिया लिच्वः नं देशं भोगे याये हे माली ।

More Stories Like this