विवेकया मत छ्यलेगु अधिकार

तःधंगु दलय् नं विवाद वइन

येँसन्ध्या टाइम्स÷संविधान निर्माणया झ्वलय् जाति भाषा धर्मया खँय् सभासद्तय्सं विवेकया मत प्रयोग याये दइ वा मदइ धकाः वयाच्वंगु विवादय् तःधंगु पार्टीतय्सं अज्याःगु अधिकार बी मजिउ धायेगु याःसां अन दुने च्वंपिं जनजातिया सभासद्तय्सं धाःसा अज्याःगु अधिकार बीमाःगु माग यानाहःगु दु । आःयात उमिगु माग उलि सशक्त जुयाः पिहां मवःनिसां थ्व अधिकारया लागिं ल्वानाच्वंपिं चीधंगु दलया सभासद्तय्त धाःसा उमिसं लिउने च्वनाः हःपाः बीगु यानाच्वंगु खँ सीदुगु दु ।

जाति भाषाया सवालय् फुक्क सभासद्तय्सं पार्टीया ह्वीप माने मयासे थःगु विवेकया मत प्रयोग याये दु धकाः संविधानसभा नियमावलीइ न्ह्यथनातःगु दुसां माओवादी कांग्रेस एमाले थेंज्याःगु तःधंगु दलतय्सं धाःसा सभासद्तय्सं ह्वीप हे माने यायेमाः विवेकया मत प्रयोग याये दइ मखु धकाः अडान कयाच्वंगु दु । तर थज्याःगु सवालय् सभासद्तय्त विवेकया मत प्रयोग यायेगु अधिकार बीमाः धकाः चीधंगु दलया सभासद्तय्सं सः तयाच्वंगु दु । थ्व छगू बुँदाय् अझ नं निर्णय मजूनिगु कारणं संविधानसभा नियमावली पारित याये फयाच्वंगु मदुनि । नियमावली मवःगुलिं उखे संविधान दयेकेगु ज्या नं न्ह्यःने न्ह्याये फयाच्वंगु मदुनि ।

विवेकया मत प्रयोग यायेगु अधिकार बी मजिउ धकाः तःधंगु दलतय्सं धयाच्वंसां आः वयाः अन हे दुने च्वंपिं जनजातिया सभासद्तय्सं धाःसा थज्याःगु अधिकार बीमाःगु खः धकाः बिचाः तयेगु याना हःगु दु । उमिसं थ्व अधिकारयात कयाः सार्वजनिक रुपं न्वमवाःसां थ्व अधिकारया निंतिं ल्वानाच्वंपिं चीधंगु दलया सभासद्तय्त धाःसा व्यक्तिगत रुपं नापलानाः थुगु अधिकारया अडान त्वःते मते धकाः इनाप याः वयाच्वंगु खँ सीदुगु दु । थ्व अधिकार खास यानाः तःधंगु दलया सभासद्तय्त हे माःगु खः । उिकं आः थ्व सभासद्तय्सं थःपिनि पार्टीं थ्व अधिकार बी मखु धाःसां मेपिंत धाःसा काये हे माः धकाः हःपाः बिउ वयाच्वंगु खः । छुं जुयाः थ्व विवाद तच्वः हे जुयावन धाःसा उमिसं नं सार्वजनिक रुपं न्ववाना हयेफुगु खँ नं धाःगु दु ।

थ्वहे झ्वलय् थ्व विवादय् नेकपा माओवादी छगू पार्टीं धाःसा माःसा विवेकया मत छ्यलयेगु अधिकार बीत थःगु पार्टी तयार दु धकाः संकेत बियाहःगु खँ सूत्रं धाःगु दु । माओवादीं थः सभासद्त प्रति थःपिंत पूर्ण विश्वास दु धासें थ्व अधिकार बीत थःपिं तयार दुगु संकेत बियाहःगु खः ।

थ्व सम्बन्धी विवाद क्वमचाःगुिलं संविधानसभा नियमावली समितिया बैठक हानं हानं च्वने मालाच्वंगु दनि ।