ग्याना पुया वंगु माओवादी आन्दोलन

राष्ट्रपति व प्रधानमन्त्रीयात सार्वजनिक थासय् बहिष्कार यायेगु आन्दोलन न्ह्याकाच्वंपिं माओवादीतय् ज्याझ्वः आः हिंसात्मक नं जुजुं वःगु दु। उकुन्हु विराटनगरय् प्रधानमन्त्री उपस्थित जुइगु ज्याझ्वलय् माओवादी कार्यकर्तातय्सं सहभागीतय् गाडी हे तोडफोड यानाः गुगु ताण्डव क्यन उकिं आः माओवादीया शान्तिपूर्ण धाःगु ज्याझ्वलं नं ग्यानापुगु लिच्वः पिकाये फइगु संकेत बिउगु दु। म्हिगः पोखराय् ला राष्ट्रपतियात समेत वहे हविगतय् थ्यंकेगु ताः तयाः माओवादीं तयारी याःगु खः तर कडा सुरक्षा व्यवस्थाया कारणं सफल धाःसा मजुल। आः भविष्यय् नं माओवादीपाखें याइगु हरेक ज्याझ्वः थथे हे ग्यानापुइगु अनुमान थनं याये जिउ। राष्ट्रपति, प्रधानमन्त्री थेंज्याःपिं विशिष्ट व्यक्तित्वतय् ज्याझ्वः हे थथे भद्रगोल जुयाः स्यं वनीगु बांलाःगु खँ मखु। माओवादीया लागिं थ्व तःधंगु खँ मखु। उमिसं न्हापा नं थथे याना हे वयाच्वंगु खः। तर देय्यात धाःसा थ्व बांलाःगु मखुत। उकिं माओवादीं छाय् थथे यानाच्वंगु खः, व बारे ध्यान तयाः जिक्व समस्या समाधान यायेगुपाखे राज्यं ध्यान बीमाःगु आवश्यकता दु। माओवादीं अडान धकाः राज्यं नं उलि हे अडान कयाच्वन धाःसा उकिं क्षति राष्ट्रयात जू वनी व उकिया दोष नं राज्यं हे व्यहोरे यायेमाली। थौं देय् संक्रमणकालं न्ह्याः वनाच्वंगु दु। थज्याःगु अवस्थाय् राजनीतिक मुद्दायात नं कानुनी बाधा न्ह्यःने तयाः थाका तयेगु पाय्छि मखु। यदि राजनीतिं सही दिशा कया वन धाःसा कानून धइगु हिलावं वनी। राजनीति स्थगित यायेत कानून दयेकीगु मखु ।

More Stories Like this