मर्यादाहिन जुयाच्वंगु नेतातय्गु भाषण

मोहनि नखः न्ह्यःने वःलिसे राजधानीइ लुटपाट व खुँज्या नं अप्वया वयाच्वंगु दु। खास यानाः दँय्दसं हे झीथाय् मोहनि नखः न्ह्यःने वल कि लुटपाट याइपिं अप्वया वइ। थज्याःबलय् प्रहरीयात नं अपराध नियन्त्रण यायेत थाकुइगु खँ स्वीकार याः ।

ख ला थुकिया सामाजिक कारण धइगु मोहनि नखःयात अनावश्यक रुपं तःधं यानाः क्यनेगु झीगु सामाजिक संरचना खः। राष्ट्रं सम्मान बियातःगु, हिन्दू मात्रया तःधंगु नखः आदि आदि धकाः मोहनियात थुलि तःधंकाः क्यना तःगु दु कि थ्व नखःयात न्ह्याथे यानाः नं तःजिक हे हने माःगु बाध्यतां क्यंका तःगु दु। आर्थिक रुपं सम्पन्नपिंसं ला तःजिक हे हनी। विपन्नपिंसं त्याय् कयाः जूसां हनी। गुमिसं छुं याये मफु उमिसं चाहिं लुटपाट यानाः जूसां हनी। मोहनिया इलय् अप्वइगु लुटपाटया अन्तर्यथार्थ थ्वहे खः ।

उकिसनं थौंकन्हय् गां त्वःताः राजधानी येँय् च्वं वइपिं मनूतय् ल्याः न्हापा स्वयां तसकं अप्वयेधुंकल। गामय् च्वनेगु अवस्था मदयाः, रोजगारी मदयाः व मेगु थीथी कारणं यानाः उपिं येँय् वःपिं खः। तर येँय् वयाः जक नं उमिगु म्हगस पूवनीगु मखु। गुकिं यानाः उमित थज्याःगु हे आपराधिक ज्या यायेत बाध्य याना बी। आः जुयाच्वंगु नं थ्वहे कारणं खः। उकिं झीगु सामाजिक संरचनायात हे हीकेगु ज्या मयाःतले थ्व अपराध याउँक नियन्त्रण जुइगु सम्भावना मदु ।

अथे खःसां अपराध ला अपराध हे खः। उकियात नियन्त्रण यायेगु लागिं गृह प्रशासन चुस्त जुइ हे माः। उकिया नापनापं सामाजिक संरचनाय् नं हिउपाः हयेगु ज्या जुयावं वनेमाः ।

More Stories Like this