धृतराष्ट्र पहःया नेतात

अनाम

धृतराष्ट्रया पुत्र मोहं यानाः महाभारत संग्राम जुल। संग्रामया लिच्वः जुल जननाश धननाश व राष्ट्र बर्बादी। वर्तमान राजनैतिक परिस्थिति हानं हिलावःगु खनेदु। माधव नेपालया सरकारं नकतिनि मधूमासया अनुभूति यात। थन हानं राजनीतिक हिउपाः वइगु संकेत वयेधुंकल। धृतराष्ट्रं पुत्र दुर्योधनया मोहं थः व कतः, भिं व मभिं, जिउ व मजिउ तकं वास्ता मयासे कायया पँ लिनाः महाभारत यात। थौं गिरिजाबाबु नं पुत्रीमोहया कारणं धृतराष्ट्र जुइगु कुतः यानाहःगु दु। माधव नेपालं सुजातायात उपप्रधानमन्त्री दयेके मफुगुया लिच्वः नेपालया सरकार हे गिरिजां क्वाराक्वारा शंका बिल। गिरिजां म्ह्याय् सुजातायात उपप्रधानमन्त्री मबिउगुया लिच्वः माधव नेपालया भारत भ्रमणय् परराष्ट्र मन्त्री जुयाः नं प्रधानमन्त्री नाप मवं। अनंलि जूगु मन्त्रिपरिषद्या विस्तारय् कांग्रेसया सुं नं मन्त्रीत उपस्थित मजू। अझ व स्वयां तच्वःगु अपमान ला गिरिजायात स्वयम् देशया प्रधानमन्त्री नापलाः वलं नं ख्वाः तक मक्यँसे लितछ्वया हल। परन्तु वहे म्हं मफुगु त्वहः तयाः प्रधानमन्त्री नाप मलाःम्ह गिरिजां प्रचण्डयात धाःसा पूरा घौछि नापलात ।

नेपाली कांग्रेसय् सःसिउपिं नेतात मदुगु मखु। भेटरान भेटरान विचारकत मदुगु मखु। अय्सां तबि गिरिजा छम्ह सःसिउम्ह नं मखु, ब्वनातःम्ह नं मखु अझ धायेमाल धाःसा नेपाः देय् स्यंकूम्ह, माओवादीयात संघर्षय् क्वफाःम्ह मनू जुयाः नं उलिमछि होनहार नेतात वयागु न्ह्यःने छाय् लाचार?
वास्तवय् माओवादी सरकारयात सत्ता सुथांलाक न्ह्याके मबिउम्ह सुं खःसा व गिरिजा हे खः। गिरिजा व गिरिजाया पार्टीं राष्ट्रपतियात कुबियाः, कटवालयात कुबियाः बिचरा प्रचण्डयात राजीनामा यायेत बाध्य यानाबिल। झिदँ झिंनिदँ तक सरकारनाप ल्वानाः मग्याःम्ह प्रचण्ड गुला सरकार चले याःबलय् गिरिजाया न्ह्यःने 'बिचरा' जुइ माल। ख ला थ्व विडम्वना मखु नेतातय् पुत्रीमोह सत्ता मोह जक खः। गिरिजां लाकमं च्वानाः सत्तां पितिना छ्वःम्ह प्रचण्ड थौं हानं वहे गिरिजानाप ल्हाः ल्वाकाः सत्ताय् वयेत कुतः यानाच्वंगु हुइनाभुइना दु। नेपाःया नेतातय् छु पहः थ्व? यदि थन हानं गुला मखु खुला मदयेक सत्ता परिवर्तन जुल धाःसा जन आन्दोलन-२ नं प्राप्त जूगु संविधानसभाया संविधान अले संघीय राज्य नीस्वने फइ मखु। थ्व नेतात यदि सत्ता जक परिवर्तन याना जुइपिं थःगु जक भलाइ स्वइपिं जुल धाःसा थुमित नेपाःमि जनतां छाय् माने यायेगु? लिथुया तमं भाःतया मुलय् च्व फाइपिंत छाय् लहिना तयेगु? यदि थन नेपालय् नागरिक समाज दु धइगु जूसा, बुद्धिजीवीत दु धइगु जूसा, नेपाःयात माया याइपिं दु धइगु जूसा, दना वयेगु लिबात। याकनं दना वयेमाल। सत्ता जक हिलाः जनतायात वास्ता मयाइपिं नेतातय्त वांछ्वयेमाल। छगू सामान्य घटनायात कयाः थन न्हिंन्हिं धइथें बन्द हडताल जुयाच्वंगु दु धाःसा थन छाय् थज्याःगु म्वाःम्वाःगु कारणं सत्ता हिलीपिं नेतातय् विरुद्ध बन्द हडताल आमरण अनसन मयायेगु? ग्व, थन अज्याःपिं देशभक्त? जनसेवकत? कुर्सिया लागि दशकौं न्यायाधीश जुइधुंकूम्ह न्यायाधीश उपराष्ट्रपति थेंज्याःम्ह मनुखं संविधान कथं सर्वोच्च अदालतं याःगु फैसला तकं माने मयासे जबर्जस्ती पदय् च्वनाच्वना। क्या गजब नेतातय् चाला ?

कुर्सिया मोह माधव नेपालयात नं दुगु जुयाच्वन। व हे कुर्सिया मोहं थौं माधव नेपाल प्रधानमन्त्री जुयाः नं 'बिचरा' जुइधुंकल। गिरिजाबाबुयात ला धाये हे माः राजनीतिज्ञ, कुतनीतिज्ञ धकाः। प्रचण्डयात कायल यानाः सत्तां कुर्का बिल। माधव नेपालयात फुले याये जिक्व फुले यानाः प्रधानमन्त्री दयेका बिल। राजनीति म्हितुम्हितुं वृद्ध जुइधुंकूम्ह माधव नेपालं नं गिरिजाया कुतनीति थुइके मफुत। मात्र वया म्ह्याय् छम्हेसित उपप्रधानमन्त्री याना मबिउगु झोंकय् थौं माधव नेपालयात कुबिया तःम्ह गिरिजां छ्वावायेत लिस्वइ मखु थें च्वने धुंकल। राजनीतिइ शत्रु नं दइ मखु, मित्र नं दइ मखु। व ला परिस्थितिइ निर्भर जुइ धाइगु धात्थें नेपालय् ला सत्य खः धइगु सीदत ।

नेतातय् थ्व चर्तिकला अध्ययन याना स्वयेबलय् नेपालय् याकनं संविधान दयेकी धइगु आशा यायेथाय् मदु। गबलय् तक थ्व ततःधंगु पार्टीत मिले जुइ मखु देश व जनताया बिचाः पाइ मखु। थः व थःगु जक भलाइ स्वयाच्वनी। थन छुं नं देश व जनताया लागि जुइ मखु। गबलय् तक थज्याःपिं नेतातय्त ठिक याइपिं नागरिक समाज, बुद्धिजीवीत, ल्याय्म्हत, विद्यार्थीत थन जन्म जुइ मखु नेतातय् पह तनी मखु। उमिसं देय् व जनताया भलाइ स्वइ मखु। हानं थन अजाःपिं पुचःत मदुगु नं मखु, तर विडम्वना अजाःपिं सकल पुचःतय्सं थःथःगु मातृ पार्टीया ख्वाः स्वयाः थःगु विवेक प्रयोग याइगु मखु ।

अथे जुयाः आःया अवस्था, आःया परिस्थिति बिचाः यानाः स्वयेबलय् सकलें नागरिक समाज, बुद्धिजीवी, ल्याय्म्ह, विद्यार्थी आदि मुनाः थःथःगु मातृ पार्टी पितृ पार्टीया स्वार्थ त्वःताः स्वविवेक प्रयोग यानाः ततःधंगु पार्टीत धकाः फुइँ यानाच्वंपिं, अहंकारी जुयाच्वंपिं, इगो ज्वना जुइपिं पार्टीया नेतातय्त ज्वनेमाल। कुनेमाल। तालं ग्वयाः छथाय् तयाः मिले मजूतले मत्वःतुसे तया तयेमाल। निगति खँय् धाःसा थजाःगु ज्या याना जुइ। तर थन मुक्कं देय्या खँय् छाय् लिचिलेगु? संघर्ष यायेमाल। आन्दोलन यायेमाल। जनतां पार्टीया विरुद्ध। थ्व आन्दोलनय् थ्व संघर्ष स्वतन्त्र जनतां जक मखु थीथी संघसंस्था अझ सरकारी संस्थात नं न्ह्यःने वयेमाः। मखुसा नेपाः स्यनीन। नेपाःमित फ्वगिं जुइन। कतःया शरणय् वनेमालीन ।

धृतराष्ट्र ला मिखा मखंम्ह। धाःगु जक न्यनाः ज्या याइम्ह। तर नेपाःया नेतात ला मिखा दुपिं खःनि। देशय् छु जुयाच्वन। जनतां गुलि दुःख सियाच्वन खंपि खः, सिउपिं खः। नेपाःया पार्टीतय् जनता धइपिं थःथःगु पार्टीया जक ला? सर्वसाधारण व उमिगु पार्टी मलिउपिं जनता हे मखुला? धृतराष्ट्र जुयाः थःथःगु जक स्वार्थ स्वयेगु ला? नागरिक समाजया नेतात धाःपिं, ल्याय्म्ह धाःपिं व हे नेतातय् नाप च्वने दतकि, लिउलिउ जुइ दतकि न्हाय् तपु जुइगु खःला मसिउ, न्ह्याग्गु याःसां सकार यानाः जुइगु 'एसवादी' जुया जुइगु। अज्याःपिंत पूवंक बुद्धिजीवी धाइ ला ?

More Stories Like this