संविधानविद् लक्ष्मण अर्याल मंत

राज्यपाखें उच्च सम्मान बीगु तयारी

येँ (सन्ध्या टाइम्स)/देशय् लागू जुयाच्वंगु वर्तमान अन्तरिम संविधान च्वयेगु ज्याया संयोजक जुयादीम्ह संविधानविद् भाजु लक्ष्मण अर्याल थौं सुथय् मंत। जलस्येँया ल्वचं कयाच्वंम्ह वय्कः वंगु छुं न्हि न्ह्यवंनिसें टिचिङ्ग अस्पतालय् वासः याकाच्वंम्ह खः ।

लछि ति न्ह्यः जलस्येँया ल्वय् तच्वयेवं वय्कःयात हवाई एम्बुलेन्सय् तयाः भारतया एपोलो अस्पताल यंकूगु खः। अन उपचार लिपा जिल धकाः लित हःगु खःसां छुं न्हि लिपा हे हानं तच्वः जुइवं बाँसबारीया गंगालाल ह्दय रोग केन्द्र व अनं लिपा टिचिङ्ग अस्पतालय् हःगु खः। टिचिङ्गय् वय्कःयात स्वन्हु न्ह्यवंनिसें कृत्रिम सासः ल्हाकाः तयातःगु खःसा थौं सुथय् वय्कःया देहावसान जुल ।

२०४६ सालय् दयेकूगु संविधान सुझाव आयोगया नं वय्कः छम्ह दुजः खःसा वर्तमान अन्तरिम संविधानया मस्यौदा च्वयेगु ज्या नं वय्कःया हे नेतृत्वय् जूगु खः। जनआन्दोलन ब्व २ लय् वय्कलं सक्रिय रुपं ब्वति कयादीगु खःसा टिचिङ्ग अस्पतालं पिहां वयाः कर्फ्यु तोडे याःपिं बुद्धिजीवीतय्त ज्वंबलय् वय्कः नं हिरासतय् लाःगु खः। आन्दोलनया सफलता लिपा नं वय्कलं नागरिक आन्दोलनय् सक्रिय रुपं ब्वति कयादीगु दु। देशय् शान्ति स्थापना यायेगु ज्याय् सक्रिय भूमिका दुम्ह वय्कः सरकार-माओवादी वार्ताया न्याम्ह पर्यवेक्षकत मध्ये छम्ह खः ।

वय्कः नेपाल बार एशोसियनया पुलांम्ह नायः नापं सर्वोच्च अदालतया पुलांम्ह न्यायाधीश नं खः। आन्दोलन लिपा वय्कःयात संविधानसभाया सभामुख दयेकीगु चर्चा जुयाच्वंगु खःसां लिपा राजनीतिक पार्टीतय्सं उकियात वास्ता मयात। छम्ह वरिष्ठ संविधानविद्या रुपय् राज्यं वय्कःयात मृत्यु लिपा जूसां तःधंगु सम्मान बीत्यंगु खँ सीदुगु दु। वय्कःयात लुमंकाः थौं सर्वोच्च अदालतय् इजलाश मच्वनीगु व बार एशोसियसनया वकिलतय्सं वहस नं मयायेगु निर्णय याःगु दु। थौं हे पशुपतिया आर्यघाटय् वय्कःया अन्तिम संस्कार जुल ।