पोखराय् नं राष्ट्रपतियात ध्वाँय्
जुजुयात सिबें नं सुरक्षा व्यवस्था कडा
येँ (सन्ध्या टाइम्स)/पोखराय् थनिंनिसें न्ह्याःगु अन्तर्राष्ट्रिय सामुदायिक वन सम्बन्धी ज्याझ्वलय् ब्वति कायेत झाःम्ह राष्ट्रपति डा. रामवरण यादवया सुरक्षाया निंतिं पोखरा नगर छगुलिं हे सुरक्षा व्यवस्था कडा याःगु दु ।
राष्ट्रपति नापं प्रधानमन्त्रीयात समेत बहिष्कार यानाच्वंपिं माओवादीतय्सं घाराघुरु याइ धकाः थथे कडा सुरक्षा तःगु खः ।
थौं पोखराय् राष्ट्रपति थ्यनेवं प्रहरीं वय्कः वनीगु लँपुया जःखः ५० मिटर क्षेत्र तक निषेधाज्ञा जारी यानाः राष्ट्रपतियात सम्मेलनस्थल तक थ्यंकूगु खः। उगु इलय् एयरपोर्टंनिसें सम्मेलन स्थल ग्रायन्ड होटेल तक यातायात चले याके मबीगुया लिसें न्यासि वनीपिंत तकं चेकजाँच यानाः जक छ्वःगु खः ।
प्रहरी एयरपोर्ट लागा जुयाः चले जुइगु फुक्कं यातायातयात वैकल्पिक लँपुं छ्वयाच्वंगु दुसा थीथी चोकय् नं प्रहरीं सवारी साधनय् कडा चेक जाँच यानाच्वंगु दु। स्थानीय मनूतय्सं धाः कथं न्हापा न्हापा जुजु सवारी जुइबलय् नं पोखराय् थुलि कडा सुरक्षा व्यवस्था तयेगु मयाः ।
तर थुकिया दथुइ नं माओवादी कार्यकर्तातय्सं धाःसा राष्ट्रपति यादवयात बिरौटा चोकय् हाकुगु ध्वाँय् क्यंनां तुं त्वःतूगु दु। लिसें पार्दीइ राष्ट्रपतिया पुत्ला प्रदर्शन यायेगु लिसें नारा जुलुस सहित वय्कःयात हाकुगु ध्वाँय् क्यंगु खः।
राष्ट्रपतिया सुरक्षाया निंतिं थौं अन जनपथ व सशस्त्र निगुलिं यानाः गुसःम्ह प्रहरी परिचालन यानागु खँ कास्कीया प्रहरी उपरीक्षक सुभासचन्द्र चौधरीं कनादीगु दु। राष्ट्रपतिया ज्याझ्वलय् सुनां नं पंगः थं वल धाःसा प्रतिकार यायेत निर्देशन बी धुनागु खँ नं वय्कलं कनादिल ।
म्हिगः विराटनगरय् पूर्वाञ्चल विश्वविद्यालयया दीक्षान्त समारोहय् ब्वति काः वंम्ह प्रधानमन्त्री माधव नेपालया विरोधय् माओवादीं याःगु प्रदर्शनय् प्रहरी व प्रदर्शनकारी दथुइ तच्वकं ल्वापु जुयाः स्थिति तनावग्रस्त जूगुलिं थौं राष्ट्रपतिया ज्याझ्वलय् अथे मजुइमा धकाः सुरक्षा व्यवस्था कडा याःगु खः ।
वन तथा भू संरक्षण मन्त्रालयया ग्वसालय् जूगु थुगु सम्मेलनया उलेज्या राष्ट्रपतिं सुथय् यानादीगु दु। सम्मेलनय् स्वीगू देय्या ७६ म्ह विज्ञ लिसें नेपाःया २०० म्ह मनुखं ब्वति कयाच्वंगु दु ।
