मर्यादाहिन जुयाच्वंगु नेतातय्गु भाषण

देय्या राजनीतिं मर्यादा व नैतिकताया अन्तिम ध्वः पुला वनाच्वंगु दु। खास यानाः माओवादी व एमालेया नेतातय्सं सार्वजनिक रुपं याइगु भाषणय् छम्ह नेतां मेम्ह नेतायात धाये जिक्व हे धयाः अपशव्द समेत छ्यलेगु याना हःगुलिं उकियात देय्या बौद्धिक ख्यलं आलोचना समेत यानाहःगु दु। मर्यादित राजनीतिक संस्कारय् नैतिकता नं उतिकं दुसा बांलाइगु खः। तर अनावश्यक रुपं न्यनेबलय् हे मछालापुगु खँग्वःत छ्यलाः भाषण यायेबलय् कन्हय् वनाः थुकिं राजनीतियात फोहोरी कासा जक मखु 'फोहोरीतय्गु कासा' समेत दयेका बीगु नं उतिकं खतरा दु ।

प्रधानमन्त्री माधव नेपाल व प्रमुख प्रतिपक्षी नेता प्रचण्ड दथुइ थौंकन्हय् अज्याःगु शव्दावलीत छ्यलाः वाक्युद्ध जुयाच्वंगु दु। उखे एमाले दुने अध्यक्ष झलनाथ खनाल व वरिष्ठ नेता केपी ओली दथुइ नं झण्डै थज्याःगु हे खँग्वः सहितया वाक्युद्धं थाय् कयाच्वंगु दु। वय्कःपिनिगु भाषणय् आः कार्यकर्ताया लागिं बौद्धिक खुराक सिबें गाली गलौजया अंश अप्वयाच्वंगु दु। थौं नेतातय्सं न्ववाइगु भाषणपाखें हे कन्हय् कार्यकर्तां वाक् कला सयेकीगु खः। थुकिं कार्यकर्तायात अध्ययन यानाः बौद्धिक पक्षं भाषण सशक्त यायेगु सिबें नं ब्वः बियाः ताली कायेगु शैली सयेकेत उत्प्रेरित याइ। दक्षिण एशियाय् खास यानाः पाकिस्तान, बंगलादेशया नेतातय् भाषण तसकं छाडा जुइगु याः। आः बुलुहुँ नेपालय् नं उकिं थाय् कयाहःगु खने दत। जिम्मेवार नेतातय्सं थःपिनि थज्याःगु टिप्पणीयात इलय् हे आत्म नियन्त्रण यायेमाःगु आवश्यकता दु ।

More Stories Like this