नेपालभाषाय् 'न्हू प्रेष्टिज नेपाः'

पत्रिका पिथनेगु ज्या अथें नं थाकु। उकिसनं नेपालभाषाया पत्रिका पिथनेगु ज्या ला झन हे थाकु। अथे जुयाः हे थौं तक नं नेपालभाषाया पत्रपत्रिकातय्गु ल्याः ल्हाःपतिनय् ल्याः खायेत नं मगाः। थज्याःगु हे मगाःमचाःयात वाःचायेकाः यलं 'न्हू प्रेष्टिज नेपाः' नांगु नेपालभाषाया छगू न्हूगु हे पहःया लय्पौया पिथना शुरु जूगु खः। आः तक नं उगु पत्रिकां निरन्तरता कायम हे यानाच्वंगु दनि। थुगुसी थुगु पत्रिका न्यादँ फुनाः खुदँय् क्यंगु दु। थ्व ल्याखं न्यागू दर्जनया ल्याखय् थ्व पत्रिका निरन्तर पिथनेधुंकूगु दु। थथे छगू भाषिक पत्रिकायात नं स्तरीय व निरन्तरता बियाः पिथनेत यलय् हे दर्ता जूगु प्रकाशन कम्पनी ललितपुर पब्लिकेशन प्रा.लि. या तःधंगु सफलता खः ।

यज्ञरत्न धाख्वाः अध्यक्ष जुयादीगु ललितपुर पब्लिकेशन प्रालिपाखें पिथनाच्वंगु थुगु पत्रिकायात नेपालभाषा जक मखु खय् भाय्या हे पत्रिका लागाय् नं छगू ब्वयेबहःगु पत्रिका कथं कयातःगु दु। आर्थिक कारणं हे नेपालभाषाया थीथी पत्रपत्रिका दिनावंगु झीगु इतिहास दु। थुलि तक कि चित्तधर 'हृदय' थेंज्याःम्हेस्यां शुरु यानादीगु 'नेपाल पत्रिका' तकं थौं पिथने मफुगु स्थिति दु। उगु पत्रिका पिथनेगु निंतिं ठाकुरलाल मानन्धर, फत्ते बहादुर सिंह नापं आपालं नेपालभाषाया दिग्गज दिग्गजपिं सक्रिय जुयादीगु खः। दांया अभाव सिर्जना जुइवं थः दाजुं शुरु याना थकुगु पत्रिकायात म्वाकेगु निंतिं धकाः नेपालभाषाया न्हापांम्ह बाखं च्वमि मोतिलक्ष्मी उपासिकां छगू लाख दां उगु पत्रिकाय् तयाः कोष नं दयेका बिल। तर पत्रिका निरन्तर रुपं पिकाये हे मफुत। अथे जुयाः नं ध्यबा दयेवं वा ततःधंपिं मनूत दयेवं जक नं पत्रिका पिथने फइ धइगु मखु जुयाच्वन धइगु क्यं। पत्रिका पिथनेत ला लगनशिलता मदयेकं मजिउगु जुयाच्वन।
'नेपाल' पत्रिका जक मखु, च्वसापासां पिकया वयाच्वंगु नांजाःगु 'सितु' ऋतुपौया नं वहे अवस्था दु। 'सितु' पिकायेत नं ध्यबा, जनशक्ति, संस्थाया समस्या दुगु मखु। तर नं पत्रिका पिकायेत धाःसा समस्या वल। तसकं हे कुतः यानां नं पत्रिका पिकाये मफुत ।

अथे जुयाः ललितपुर पब्लिकेशन प्रालिपाखें झी नेवाःतय्गु हे गौरव जुयाच्वंगु छगू स्तरीय पत्रिका 'न्हू प्रेष्टिज नेपाः' शुरु याःगु खः। मधुपर्क, गरिमा थेंज्याःगु सरकारी अनुदान दुगु पत्रपत्रिकां हे न्यूज प्रिन्टय् पत्रिका पिथनेगु शुरु यानाच्वंगु इलय् छगू नेवाः पत्रिकां ह्वाइट पेपरय् पत्रिका पिथनाः मेमेगु पत्रिकायात नं क्यनेबहःगु ज्या याना बिउगु दु।
समान बिचार दुपिं मनूतय् दथुइ जक आर्थिक कालबिल व तिबः सम्भव जुइ। कम्पनी शुरुइ द्यापं फयेमाःसां 'न्हू प्रेष्टिज नेपाः' पत्रिकां साहित्य, मनोरञ्जन, कासा, बिचार व राजनीतिक ख्यलय् न्ह्यलुवाया भूमिका म्हितूगु दु। पत्रिका म्वाकेत गम्भीर जुइफुपिनि टीम दुगु कारणं यलं ह्वाइट पेपरय् पिथनीगु छगू जक पत्रिका 'नेवाः प्रेष्टिज नेपाः' आः तक निरन्तर रुपं पिथनाच्वंगु खः।
झीथाय् पत्रिका पिकायेगु ज्या या त व्यक्तिगत कुतलं जुयाच्वंगु दु, या त भाषिक ज्याखँ यायेत स्वनातःगु संस्थां पिकायेगु यानाच्वंगु दु। पत्रिका हे पिकायेगु धकाः प्रकाशन संस्था स्वनाः हे पौ पिकयाच्वंगु म्हो जक दु। अथे म्हो जक पत्रिकात मध्यय् छगू जुयाः पिहां वयाच्वंगु पौ खः 'न्हूगु प्रेष्टिज नेपाः'। खतुं छगू ई यलदेय् नं पत्रपत्रिका पिकायेगु ज्याय् न्ह्यःने हे लानाच्वंगु खः। तर समग्र नेवाः आन्दोलनय् वःगु 'मन्दीं' यलया भाषिक पत्रकारिता नं प्रभावित जुल। आः उकियात पर्के कथं 'न्हू प्रेष्टिज नेपाः' या प्रकाशन जुयाच्वंगु दु। थुकियात यल देय् व झीगु मांभाय्या प्रतिष्ठा कथं कायेमाः ।

More Stories Like this