प्रमयात ध्वाँय् क्यनेवं ल्वापु
विराटनगर थौं सुथंनिसें तनावग्रस्त
येँ (सन्ध्या टाइम्स)/ माओवादीया पूर्व घोषित ज्याझ्वः कथं प्रधानमन्त्रीयात बहिस्कार यायेगु झ्वलय् थौं विराटनगरय् माओवादी कार्यकर्ता व प्रहरी दथुइ ल्वापु जूगु दु। पूर्वाञ्चल विश्वविद्यालयया दीक्षान्त समारोहय् ब्वति कायेत
विराटनगर वंम्ह प्रधानमन्त्री माधव नेपालयात माओवादी कार्यकर्तातय्सं हाकुगु ध्वाँय् क्यनेवं अन निथ्वःसिया दथुइ ल्वापु जूगु खः। ल्वापुइ लानाः माओवादीया झिम्ह कार्यकर्ता घाःपाः जूगु दु ।
प्रहरीं ल्वापु नियन्त्रण यायेत आपालं शेल टियर ग्याँस नापं कयेकूगु खः। समाचार तयार यानाच्वनागु इलय् तक अन प्रहरी व माओवादी कार्यकर्ता दथुइ ल्वापु जारी हे जुयाच्वंगु दनि।
ल्वापुया झ्वलय् माओवादी कार्यकर्तातय्सं अन छगः निजी गाडी नं तोडफोड याना बिउगु दु ।
माओवादी कार्यकर्तातय्सं हाकुगु ध्वाँय् क्वनेगु झ्वलय् प्रहरीं उकियात पनेत स्वयेवं निगुलिं पुचः दथुइ ल्वापु जूगु खः ।
अनया स्थिति न्हिनय् नं तनावपूर्ण जुयाच्वंगु दुसा प्रहरी व माओवादी ल्वापुया कारणं अनया यातायात लिसें बजाः नं बन्द जुइधुंकूगु दु ।
वंगु प्यदँ न्ह्यवंनिसें याये मफयाच्वंगु दीक्षान्त समारोह अनया सहिद रंगशालाय् थौं यायेगु ग्वसाः दयेका तःगु खः। तर स्थिति तनावपूर्ण जूगुलिं थ्व ज्याझ्वः नं प्रभावित जुइ फुगु खँ धाःगु दु ।
कार्यक्रमस्थलय् आपालं प्रहरी परिचालन यानातःगु दुसा माओवादीया कार्यकर्तात नं अन मुनाच्वंगुलिं स्थिति थप तनावपूर्ण जुयाच्वंगु दु ।
माओवादीं प्रधानमन्त्री व राष्ट्रपतिया लिसें सरकारय् संलग्न मन्त्रीतय्त समेत थुकथं बहिस्कार याना वयाच्वंगु खः। थ्व झ्वलय् सञ्चार मन्त्री, गृह मन्त्री व अर्थ मन्त्री माओवादी विरोधया शिकार जुइधुंकूगु दु ।
उखे थौं हे प्रधानमन्त्री नेपालं अनया सुरक्षास्थितियात कयाः सुरक्षा निकायया उच्च पदाधिकारीतलिसे सहलह यानादिल। लिसें वय्कलं पूर्वाञ्चल विश्वविद्यालयं दयेकेत्यंगु मेडिकल कलेजया थाय् नं निरीक्षण यानादीगु दु ।
