न्हापांम्ह जनजाति प्रधानसेनापति

नेपाःया सैनिक इतिहासय् न्हापांखुसी छम्ह जनजाति समुदायया दुजः सेनाया सर्वोच्च पदय् थ्यंगु दु। भाजु छत्रमान गुरुङयात प्रधानसेनापति नियुक्त यायेवं देशय् थ्व इतिहास नं कायम जूगु खः। थुज्वःगु ऐतिहासिक घडीया पात्र जुयादीम्ह भाजु गुरुङ सकस्यां बधाईया पात्रा जुयादीगु स्वाभाविक खः ।

जनजाति दुने नं गुरुङ जातिं सेनाय् दुहां वनाः मुलुकया रक्षा याना वयाच्वंगु ताः ई हे दयेधुंकल। नेपाली सेना दुने गुरुङ जातिया बिस्कं शान व शौर्य दु। तर नेपाली सेनायात धिसिलाकेगु ज्याय् उलिमछि योगदान दुगु गुरुङ जातिया सुं दुजः वहे सेनाया सर्वोच्च पदय् थ्यंकेत धाःसा देशं राजतन्त्र हे समूल नष्ट जुइमाल। राजतन्त्र दत्तले सेनाया महत्वपूर्ण थां जुयाच्वंपिं गुरुङ जातियात च्वय्या पदय् तयेबहःपिं धकाः गबलें नं मतायेकू। उमित न्ह्याबलें सेनाया सिपाहीं जक दयेका तल। थौं देशय् सामन्ती राजतन्त्रया अन्त जुइधुंकाः हे तिनि सेनाया लागिं ज्यान बिया वयाच्वंपिं गुरुङ जातियात सेनाया सर्वोच्च पदय् थ्यनेगु अवसर चूलात ।

खतुं छत्रमान गुरुङ छम्ह जनजाति कायमचा खःसां वय्कलं देय्या जनजाति आन्दोलनय् छुं भूमिका म्हितूगु वा म्हिते फइगु छुं सम्भावना धाःसा पटक्क हे मदु। अन वय्कलं छम्ह विशुद्ध सेनाया हे जक भूमिका म्हितादी। देशय् गणतन्त्र वयेधुंकाःयाम्ह वय्कः न्हापांम्ह सेना प्रमुख जूगु कारणं सेनायात नं न्हूगु परिस्थिति अनुरुप हीकेगु दायित्व धाःसा वय्कःया ब्वहलय् वःगु दु गुगु पुलांम्ह प्रधान सेनापतिपाखें जुइ मफुत। थुकियात वय्कलं पूवंकेमाः ।

More Stories Like this