झी मिले मजूसा विदेशीया ल्हातय् सत्ता

डी. आर. खड्गी

प्राचिनकालंनिसें भारत सुन्दर बिकसित सभ्य देश खः। भारतय् विद्वान व विवेकी तयार याइगु आध्यात्मिक पाठशाला यक्व दु। भारतया उत्तर प्रदेश व बिहार थ्व निगू थासय् आध्यात्मिक पाठशाला मेमेगु प्रदेशय् स्वयां अप्वः खनेदु। थ्व निगू राज्य विश्वया महान पण्डित विद्वान व आध्यात्मिक गुरु तयार जुयाः भारतय् जक मखु विश्वया यक्व थासय् वनाः धर्म प्रचार यानाच्वनी। थ्व निगू राज्ययात भारतया अन्न भण्डार धायेगु नं याः। जब अंग्रेज साम्राज्य भारतय् वयाः थःगु अधिनय् तल विशेष यानाः उत्तर प्रदेश व बिहारयात केन्द्र बिन्दु दयेकाः शासन यात। अंग्रेजं भारतय् राज्य चले यानाच्वंगु इलय् दक्षिण भारतय् धाःसा फ्रान्स व पोर्चुगलं शासन यानाच्वंगु खः। लिपा अंग्रेजं सम्पुर्ण भारतयात थःगु अधिनय् तयेत सफल जुल। अंग्रेजं भारतय् जक मखु विश्वया यक्व देशय् थःगु साम्राज्य चले यानाच्वंम्ह देश खः। अंग्रेजं यक्व दँ तक भारतय् सफलतापूर्वक शासन यानाच्वने फुगु कारण मध्ये छगू थ्व खः। भारतीय जनतायात नकारात्मक सन्देश बियाः छगू समूदायं मेगु समूदाययात ल्वाकेत सफल जूगुलिं खः। अंग्रेज उत्तरप्रदेश व विहारय् यक्व पाठशाला स्थापना यात। थ्व निगू राज्यया जनताया मनोभावना स्यंकेगु लागिं खुँ यायेगु, ठग यायेगु पाकेटमार यायेगु व छम्ह व्यक्तिं मेम्ह व्यक्तियात विश्वासघात यायेगु शिक्षा बीत सफल जुल। थज्याःगु नकारात्मक व्यक्ति तयार याइगु पाठशालापाखे जनता यक्व खुँ, ठग, पाकेटमार व विश्वासघाती जनता तयार यानाः छगू समूदायं मेगु समुदायनाप ल्वाकेत सफल जुल। अंग्रेजं भारतया शासन त्वःता वंगु करिब ६० दँ दयेधुंकल अझ नं खुँ, ठग, पाकेटमार व विश्वासघात याइपिं यक्व दनि। अंग्रेजया नकारात्मक शिक्षां यानाः विहार व उत्तर प्रदेशया जनतायात विश्वं हे घृणा यानाच्वंगु दु। दक्षिण भारतं थ्व निगू राज्यया नागरिकयात आक्रमण तक यानाच्वंगु दु। छाय्धाःसां थ्व निगू राज्यया नागरिकं दक्षिण भारतयात प्रदुषित यानाच्वन धइगु उमिगु द्वपं दु ।

भारतया थ्व निगू राज्यया मनूत मेमेथासय् ज्या याः वनेगु याइ। झीगु देशय् धाःसा नेपाः नयेगु हिसाबं चांचां दुहां वयाच्वनी। थौं वयाः विदेशी मूलया नागरिकं नेपाःया उच्च पदय् थ्यंकाः नेपाली जनतायात शोषण दमन व विस्थापित यायेत सफल जुजुं वनाच्वंगु दु। झीगु देशय् थ्व निगू राज्यया नागरिकतय्त स्वयम भारत सरकारं हे छ्वया वयाच्वंगु खः। भारत सरकारं खुल्ला रुपं तराईया सशस्त्र पुचः व निःशस्त्र पुचः (पार्टी) यात सहयोग व समर्थन यानाच्वनागु खः धकाः राज्यस्तरया नेतात राम बिनोद सिंह व उद्धव कुँवरं धायेधुंकूगु दु। वय्कःपिंसं थथे नं धाल नेपाःया तराईलय् ल्वाभःया राजनीति आवश्यक दु। ल्वाभःया शत्तिं्क जक यक्व चिज प्राप्त जुइगु खँ नं धाल। अथे जूगुलिं तराईया ल्वाभः आत्मघाती पुचःयात जिमिसं सहयोग व समर्थन यानागु खँ नं कन। हतियारया बलं हे तराईया पहाडीतय्त बिस्थापित यायेत सफल जूगु खः धाल। मेगु थ्व नं धाल कि निःशस्त्र पुचः (पार्टी) पाखे नं चुनाव मार्फत नेपाःया उच्चपद कब्जा याकेगु लागि जिमिसं भोट व नोट निगुलिं प्रयोग यानाः मधेशीवादीपाखें तराईया अधिकांश सिटय् बिजय प्राप्त याके फत। नेपाःया राजनीतिया मुख्य रिमोट मधेशवादी दलया ल्हातय् लाःगु दु। थ्व सफलता धयागु जिमिगु सहयोग व समर्थनपाखें जूगुलिं जिपिं लय्ताः धकाः नं राज्यस्तरया निम्ह नेतात खन्ना व कुँवरं फूर्ति यानाः धाल। थ्व धापूयात भारतया हस्तक्षेप धायेगु कि मधायेगु नेतातय्सं स्पष्ट यायेमाल। भारतया आन्तरिक सुरक्षा विशेषज्ञ वर्माया पुलांम्ह राजदूत विनोद खन्नां नं खुल्ला रुपं धाल कि नेपाः व चीनया सम्बन्ध विकास जूगु भारतयात स्वये मयः। मेम्ह सुरक्षा विशेषयज्ञ जी.पार्य. सारथीं बरु थःगु विवेकं सत्य खँ न्ववात। वय्कलं धयादिल तराईलय् हतियारधारी पुचःतय्त ग्वाहालि यायेगु बन्द याये माल। यदि भारतं ग्वाहालि यायेगु बन्द मयात धाःसा भारत विरोधं चर्को रुपं कायेफु। वय्कलं हानं धाल कि यदि नेपालय् देशभक्त नेतात सत्ताय् वन धाःसा श्रीलंकाय् थें विदेशी विद्रोहीतय्त सखाफ याना यंकी।

भारत व अमेरिकाया नीति खः नेपालय् देशभक्त जनतायात माइनस यायां यंकेगु। मेगु नीति खः सच्चा कम्यूनिष्टत न्हंकाः नक्कली कम्यूनिष्ट तयार यायेगु। सच्चा कम्यूनिष्ट व देशभक्त नेतात दत्तले भारत व अमेरिकाया स्वार्थय् ज्या जुइमखु धइगु खँ उमिसं सिउ। झीगु देय्या खस ब्रम्हू व मधेशीवादी नेतात स्वार्थी लोभी व्यक्तिवादी जुयाच्वंगु कारण खः विदेशीया तन्त्रमन्त्रया प्रभावय् लानाच्वंगुलिं खः। अथे जूगुलिं कम्यूनिष्टतय्सं जक मखु मेमेगु पार्टीया नेतातय्सं नं सिद्धान्त व नीतिइ च्वनाः देशहित यायेगु ज्या त्वःताः देश घातक ज्या यानाच्वंगु खः। आः नं झी नेतातय्गु भरोसाय् च्वन धाःसा झी बर्बाद जुजुं वनेफु। झी छप्पँ जुयाः नकली नेतात व विदेशी मूलया नेतातय्त ठिक यानाः भिंपिं देशभक्त नेतात तयार याये मफुत धाःसा देय् जक वर्बाद जुइगु मखु देय् सिक्किमीकरण जुइत थाकुइ मखु। सिक्किमय् फुक्क चुनावं त्यानावंपिं नेतातय्सं भारत नाप विलय जुइगु धकाः अध्यधिक बहुमतं पास यात। भुटानय् नं रक्षा व परराष्ट्रया जिम्मा दिल्ली सरकारयात बिया बिल ।

सिक्किम भारतनाप विलय जुइमाःगु कारण खः - नेतात दलाल जूगुलिं। भूटान धाःसा चीधंगु देश, अन्तर्राष्ट्रिय स्वापू विकास मजूगुलिं भारतयात रक्षा व परराष्ट्रया अधिकार बीत बाध्य जुल। नेपाःया अवस्था अथे मखु स्वतन्त्र सार्वभौम राष्ट्र विश्वनाप नं सम्बन्ध क्वातुयावंगु दु। अथे जूसां देय्या मूलवासी मिले जुइ मफुसा विदेशीमूलपाखें शासन याका च्वने माल। सिक्किम व भूटान भारतया अधिनय् दुसां देशवासीयाके देशभक्त भावना दुगुलिं थःगु अर्थतन्त्रयात भारतीय मूलं कब्जा याके मजिउ। सिक्किम व भूटानया बजारय् खसब्रम्हू व मारवाडीतय्गु पसः छगू नं खनी मखु। अनया जनतां थुपिं देशया भिं याइपिं मखु धकाः याना तःगु दु ।

More Stories Like this