वसपोल नर्स गुरुमां

भिक्षुणी जीवन गृहस्थी जीवन स्वयां अतिकं पाः। अथे जूसां वसपोल वीरगंजया होस्टेलय् च्वनाबिज्यात। उगु इलय् वसपोलयात अष्टशील पालना याये तसकं थाकुल।
'धम्मावती गुरुमांया उजंकथं जिं अष्टशील काये। मफुसां पंचशील गबलें मत्वःता।' वसपोलं धयाबिज्यात। उगु होस्टेलय् च्वंवःपिं तःम्हमछि हे पासापिं 'होमसिक'या शिकार नं जुल। तर वसपोल धाःसा न्हापांनिसें विहारय् च्वनीगु जूगुलिं अज्याःगु समस्या पिहां मवल।
वसपोलया दिनचर्या मेपिं नर्सतय्गु दिनचर्या स्वयां पाः। वसपोलं न्हियान्हिथं नित्यपूजा यानाबिज्याइ। विहारया नियम नं पालना यानाबिज्याइ। थःगु ड्युटी मदुगु इलय् सकलें भिक्षुणीपिं सरह भोजन नं बिज्याइ। धर्म देशना यायेगु निसें भिक्षुणीया सकतां नियम पूवंका बिज्याइ। अथे खःसां छम्ह भिक्षुणी जुयाः नर्स ज्या याना जुल धकाः वसपोलया आलोचना याइपिं नं दु। नर्स ब्वनेगु खःसा गृहस्थी जुयाः ब्वंसां जिउ धाइपिं नं म्हो मजू। वसपोलं धयाबिज्यात - बुद्ध धर्म धयागु व्यवहारिक धर्म खः। थुकिं सकसियां भिं यायेगु व सेवा यायेगु हे स्यनी। ल्वगिया सेवा यायेगु नं बुद्ध धर्मया छगू सिद्धान्त हे खः ।

थौं वसपोलयात हाकनं गृहस्थी जीवन हनेगु इच्छा मदु। छगू इलय् भिक्षुणी जीवन त्वःताः विदेशय् आखः ब्वंवने ला धइगु बिचाः नं वःगु खः। तर जब अस्पतालय् ज्या याना अन नाना कथंया ल्वगित खन। थुकिं यानाः अनित्य दुःख अनात्मा धइगु खँ वास्तविकता कथं जिगु न्ह्यःने दंवल। जिं गृहस्थी जीवनय् छुं मदु तायेका। भिक्षुणी जुयाः हे ल्वगिया सेवा यायेगु निर्णय याना।' वसपोलं कनाबिज्याइ ।

वसपोलं थम्हं ज्या याना वःगु ध्यबा भविष्यय् हाकनं थः बीएन ब्वनेया लागिं यानादीगु दु। अथे हे यदि सुं नं भिक्षुणी जुयाः नर्स ब्वनेगु इच्छा याःसा थम्हं फक्व ग्वाहालि यायेत नं तयार जुया च्वनाबिज्याःगु दु। धयाबिज्यात, 'थौं जि याकःचा भिक्षुणी पुचलय् नर्स जुल। थुगु संघय् छम्ह जक नर्स दयां मगाः। यदि तःम्हमछि दत धाःसा संघया सेवा याइपिं नं आपाः दइ ।

यदि छि काठमाण्डौं मोडेल अस्पताल बागबजारय् झाल धाःसा अन सकलें स्वयाः बिस्कं पहः वःम्ह छम्ह नर्सयात खंकादी। सकलें स्वयाः पाःगु सियूगु रंगया लँ पुनाः छ्यनय् पाचुक सँ खानां स्वये हे भिक्षुणी पह वः। वसपोलयात खनेवं सकसियां मनय् न्ह्यसः दनी। वसपोल छम्ह भिक्षुणी ला मखु?' पक्का नं वसपोल छम्ह भिक्षुणी हे खः। वसपोलया नां खः रमावती गुरुमां ।

वसपोल धर्मकीर्ति विहार श्रीघलय् च्वनाबिज्याइ। थौं स्वयां १३ दँ न्ह्यः वसपोलं गृहस्थी जीवन त्याग यानाबिज्याःगु खः। बलम्बुया गोविन्द महर्जन व मय्जु महर्जनया कोखं जन्म जूम्ह वसपोलया गृहस्थी नां रंजना महर्जन खः। अबलय् सुजाता गुरुमांया धर्मदेशना न्यनाः वसपोलपाखें प्रभावित जुयाः वसपोलं गृहस्थी जीवन त्याग यानाबिज्याःगु खः।
अनंलि वसपोल प्रभात मा.वि. श्रीघलय् हे आखः ब्वनाबिज्यात। उगु स्कूलं हे वसपोलं एसएलसी नं पास यानाबिज्यात। एसएलसी लिपा नर्स हे ब्वने धयागु बिचाः ला मदु। तर फाराम छगू भरे याना तये धइगु बिचारं फाराम बुझे यात। छुं महिना लिपा नां पिहां वल ।

छम्ह भिक्षुणी जुयाः नर्स ब्वनेगु धयागु अतिकं चुनौतिया खँ खः। नर्स ब्वनेत ब्वने जक धयां मगाः थुकी आर्थिक भार नं आपालं माः। थुकिया लागिं धम्मावती गुरुमां नं वसपोलयात यक्व हे हःपाः व तिबः बियाबिज्यात ।

वसपोलं विहारय् बिज्याइपिं गीता ततापिनिगु ट्राभल्सय् छात्रवृत्तिया लागिं माग यानाबिज्यात। तर थुकीइ लागत अप्वः जूगुलिं छात्रवृत्ति मिले मजुल। तर गीता ततां वसपोलयात छम्ह अमेरिकी म्हसीका बियादिल। उम्ह अमेरिकीया नां खः रोयाना दिमानो। रोयनां वसपोलयात ब्वनेया लागिं माःगु सकतां ग्वाहालि यायेगु बचं बियादिल। वय्कःया ग्वाहालि हे वसपोलं स्वदँ तक ब्वनेमाःगु स्टाफ नर्स ब्वने क्वचायेकाबिज्यात ।

नर्स खयां नं थःके गुरुमां जुयाः म्हितेमाःगु मेगु भूमिका नं दुगुलिं छु यायेगु द्विविधा मवःगु मखु। तर नर्सिङ्ग ज्या मयासे अथें च्वनाच्वन धाःसा ल्वःमना वनी धकाः वसपोलं अस्पतालय् ड्यूटी नं यानादिल। थौंकन्हय् धर्मकीर्तिइ वसपोल थुज्वःम्ह व्यवसायिक नर्स दुगुलिं सुं नं भन्ते गुरुमांपिं उसाँय् मंत धाःसा ग्यायेम्वाःगु अवस्था दु ।

More Stories Like this