झिंछम्ह सभासद् गिरफ्तार
पुलिस क्लब दुने ल्वापु, छम्ह प्रहरी घाःपाः
येँ (सन्ध्या टाइम्स)/ सिंहदरवारय् धर्ना च्वन धकाः ज्वना यंकूपिं दलित आन्दोलनया कार्यकर्ता व प्रहरी दथुइ भृकुटीमण्डपया पुलिस क्लब दुने हे ल्हाःल्हाः तयाः ल्वापु जूगु दु। उकी लानाः छम्ह प्रहरी नं घाःपाः जूगु दुसा कुनातःपिं कार्यकर्तातय्सं थ्व घटनायात कयाः गृह मन्त्रीं माफी फ्वनेमाः धकाः हिरासत दुने हे नाराबाजी याःगु दु ।
राष्ट्रिय दलित मुक्ति मोर्चापाखें थःपिंसं सरकारयात बियातःगु थीथी माग पूवंकेत माग यासें थौं सिंहदरवार पिने धर्ना बिउगु खः। प्रहरीं सिंहदरवार पिने निषेधित क्षेत्रय् धर्ना बिल धकाः लाठी चार्ज समेत यानाः उमित ज्वना यंकल। ज्वना यंकूपिं मध्ये झिंछम्ह दलित सभासद्त नं दु। सभासद् व कार्यकर्ता नापं यायेबलय् करिब ७० म्हेसित ज्वना हःगु खः ।
तर प्रहरीं ज्वनेधुंकाः गाडी दुने नं सभासद् व कार्यकर्तायात दाःगु जुयाच्वन। प्रहरीं सभासद् पद्म विश्वकर्मायात समेत गाडी दुने हे दाःगु खँ वय्कलं कनादीगु दु ।
वयां लिपा ज्वना हःपिं सकसितं पुलिस क्लब दुने कुना तल। कुनातःगु इलय् नं छम्ह म्हमसिउम्ह मनू वयाः 'छिकपिं सभासद् थेंज्याःगु पदय् च्वनाः नं थज्याःगु म्वाः मदुगु ज्या यायेगु ला?' धकाः ब्वः बिउ वयाच्वन खनिं। दलित कार्यकर्तातय्सं उम्ह मनू सिआईडी जुइमाः धकाः अन हे हातपात यात। लिपा वयात त्वःतकेत प्रहरीं हस्तक्षेप याःबलय् निगू पुचः दथुइ ल्हाःल्हाः तयाः ल्वापु जुल। वहे ल्वापुइ लानाः छम्ह प्रहरी नं घाःपाः जूगु खः ।
ल्वापु लिपा सभासद् व कार्यकर्तातय्सं प्रहरी दमन मुर्दावाद धकाः नारा थ्वयेकेगु शुरु यात। ज्वनातःपिं मध्ये सभासद् नं दु धइगु सीकाः प्रहरीं उमित छुं ई लिपा हे छेँय् वंसां जिउ धकाः त्वःतूगु खः। तर सभासद्तय्सं धाःसा थःपिंत प्रहरीं दुर्व्यवहार याःगु व पुलिस क्लब दुने तकं लाठीचार्ज याःगुलिं थुकिया निंतिं गृह मन्त्रीं हे माफी फ्वनेमाः धइगु माग यासें माफी मफ्वंतले अनं पिहां वने मखु धकाः दुने हानं धर्ना च्वनाच्वंगु दु। न्हिनय् १२ बजे तक सभासद् व दलित कार्यकर्तातय्सं छेँय् हुँ धाःसां नं मवँसे दुने हे च्वनाः नाराबाजी यानाच्वंगु दनि ।
