एम्नेष्टीइ नं भ्रष्टाचार
एम्नेष्टीकर्मीतपाखें आन्दोलनया ख्याच्वः
येँ (सन्ध्या टाइम्स)/विश्वय् हे मानव अधिकार बहालीया लागिं तःधंगु योगदान बिया वयाच्वंगु एम्नेष्टी इन्टरनेशनलया नेपाः शाखा दुने धाःसा थवंथवय् भ्रष्टाचारी, गैर कानुनी धइगु द्वपं बिसें ल्वापु शुरु जूगु दु। ल्वापुया झ्वलय् एम्नेष्टीया छुं छुं समूहया प्रमुखतय्सं आन्दोलन शुरु याःगु दुसा आन्दोलनया झ्वलय् एम्नेष्टी ज्याकुथी तालं ग्वयेगु निसें नेपाःया प्रमुख निर्देशकयात हाकुगु ध्वाँय् क्यनेगु तकया ज्याझ्वः पित हःगु दु ।
एम्नेष्टीया राष्ट्रिय कार्यकारी समितिपाखें वंगु भदौ १३ व १४ गते च्वंगु बैठकं एम्नेष्टी नेपाल शाखा अन्तर्गत लाःगु येँया १३ गू व येँनं पिनेया नं आपालं समूहत छुं हे कारण मदयेक खारेज याना बिउगु धासें अथे खारेजीइ लाःगु समूहया दुजःतय्सं थ्व आन्दोलनया घोषणा याःगु खः। उमिसं आन्दोलनया झ्वलय् अध्यक्ष हेमकुमार खड्का व निर्देशक रामेश्वर नेपालया राजीनामा समेत फ्वंगु दु। उमिसं पिकाःगु वक्तव्यय् एम्नेष्टी दुने आपालं आर्थिक हिनामिना जुइगु, बैठक च्वंक्वपतिं भत्ता काइगु, छगू कल फोन सुयातं मयाःसां फोन भत्ता काइगु, संस्थायात राजनीतिक अखडा दयेकेत कुतः याःगु आदि द्वपं बियातःगु दु ।
थ्व फुक्कया छानबिन यायेगु व उकुन्हु खारेज याःगु समूहतय्त हानं म्वाकेमाःगु माग यासें उमिसं न्हय्न्हुया अल्टिमेटम समेत बिउगु दु। यदि थःपिंसं बियागु अल्टिमेटम दुने नं थ्व माग पूरा मयात धाःसा मूलुखाय् तालं ग्वयेगु निसें हाकुगु ध्वाँय् क्यनेगु तकया ज्या यायेगु ख्याच्वः बिउगु दु ।
