बाल बौद्ध प्रतिभा धेंधेंबल्लाः

रीना तुलाधर

भिक्षुणी धम्मवती गुरुमांया ७५ दँ बुदिंया लसताय् धर्मकीर्ति बौद्ध अध्ययन गोष्ठीया ग्वसालय् प्यवाः न्ह्यवंनिसें न्ह्यानाच्वंगु बाल बौद्ध प्रतिभा प्रतियोगिता वंगु शनिवाः नांजाःम्ह गायिका, समाजसेवी आनि छोइंग डोल्माया मू पाहांसुइ लिपांगु प्रतियोगिता क्वचाल ।

विशेष यानाः चीधिकःपिं मस्तय्त बौद्ध शिक्षा बीगु मू तातुना ज्वनाः न्ह्याःगु उगु ज्याझ्वलय् च्यादँनिसें गुदँ तकया नीम्ह ब्वति काःपिं मस्तय्त न्हापां निवाः तक धर्मकीर्ति विहारया गुरुमांपिनिपाखें धर्म देशना, बाखं कनेगु ज्या जुल। नाप नापं बाखंया आधारय् न्ह्यसः लिसः न्यनेगु ज्या जूगु खः ।

थौंकन्हय्या मस्तय्त विहारय् हयाः बौद्ध शिक्षा बीत उमित छुं छुं आकर्षण नं बीमाःगु समयसापेक्ष स्थितियात कयाः धर्मकीर्ति बौद्ध अध्ययन गोष्ठीं न्हापां थुकथं बौद्ध शिक्षाया झ्वलय् प्रतिभा प्रतियोगिता ज्याझ्वः न्ह्याकूगु खः।
प्रतिभा ब्वज्याया झ्वलय् छगू वालय् मस्तय्सं म्ये हालेगु, प्याखं हुइगु, चित्रकला च्वयेगु, हस्तकला, समाचार सम्प्रेषण, परित्राण पाठ इत्यादि प्रतिभा क्यनेगु ज्या जुल। वयां लिपा थुपिं सहभागी मस्तय्त फेशन मोडेल रति कंसाकारपाखें क्याटवाक् नापनापं ब्यूटी प्याजेन्टय् दुथ्याइगु मेमेगु कलात स्यनेगु प्रशिक्षण छवाः तक न्ह्याःगु खः। अन्तिम प्रतियोगिता कुन्हु क्याटवाक्या झ्वलय् न्ह्यसः लिसलय् हाकनं मस्तय्त उमिसं ब्वना तःगु बौद्ध सफूया आधारय् न्ह्यसः लिसः जूगु खः ।

प्यम्ह निर्णायकपिं मदनरत्न मानन्धर, नवीन चित्रकार, नगीना जोशी व राहुल तुलाधरपिनि मुल्यांकनं यानाः विमुक्ता तुलाधर वीनर, ऋद्धि तुलाधर फस्ट रनर अप, शिस्या चित्रकार सेकेण्ड रनर अप जूगु खः। वेस्ट पर्सनालिटी ऋद्धि तुलाधर, बेस्ट वाक् दीपकंर शाक्य, वेस्ट ट्यालेन्ट विपस्सना शाक्य, बेस्ट वन्दना विमुक्ता तुलाधर, वेस्ट ड्रेस पल्पसा शाक्य लाःगु खः। ज्याझ्वलय् पल्पना शाक्य, श्रावस्ती तुलाधर, ऋद्धि तुलाधर इत्यादिपिंसं प्याखं हुलाः क्यंगु खः।
रुबिना तुलाधर व पल्पसा तुलाधरपिनिपाखें न्ह्याकूगु ज्याझ्वलय् मू पाहां आनि छोइंगपाखें म्येँ हालाः न्यंकेगु नापनापं स्वकुमिपिंत नं थः नापनापं म्येँ हायेकाः ज्याझ्वः झःझः धायेकादिल ।

श्रद्धेय धम्मवती गुरुमांनं विहारय् नं प्याखं हुइकेगु ज्याझ्वः जुल धकाः आलोचना वयेफु तर जिउ थे यानाः जिउगु माध्यमं बौद्ध शिक्षा प्रचार यायेमाःगु थौंया आधुनिक युगया माग खः धयाबिज्यात। स्वयम् भगवान बुद्धं छम्ह वाद्य वादकयात प्रशंसा यानाबिज्याःगु बुद्धकालीन बाखं नं वसपोलं कनाबिज्यात ।

ज्याझ्वलय् प्रफुल्ल ताम्राकार, रमा कंसाकार, लोचनतारा तुलाधरपिंसं मंकाः कथं योगदान बियादीगु खःसा ज्याझ्वःया मू संयोजक रामकुमारी मानन्धर खः ।

More Stories Like this