प्रधानमन्त्रीं बचे याःगु ज्यान

नकतिनि रुकुमया छम्ह प्वाथय् दुम्ह मिसायात प्रधानमन्त्री माधव नेपाल थः हे च्वनावंगु हेलिकप्टरं उद्धार यानाः येँय् हसें बचे याःगु समाचार सञ्चार माध्यमय् बय्बय् जूगु दु। थ्व घटनां प्रम नेपालया जनता प्रतिया जिम्मेवारीवोधयात स्पष्ट हे उला बिउगु दुसा थुकिया निंतिं वय्कःयात सकस्यां सुभाय् बीगु नं स्वाभाविक खः ।

तर थुकिया नापनापं थ्वहे घटनां नेपाःया दुर्गम लागाय् च्वनाच्वंपिं गरीब नेपाली जनता गय् यानाः म्वानाच्वन व उमिगु जीवनयात राज्यं गुलि मू बियाच्वन धइगु यथार्थ नं छ्याताहां जूगु दु। प्वाथय् सीम्ह मचा घानाः म्वानाच्वंम्ह मिसाया पीडा व जीवनया पल पलयात झीसं महसुस यायेफु। तर वयात बचे यायेगु छुं नं कथंया जिम्मेवारी व संयन्त्र राज्ययाके मदु। स्वयम् प्रधानमन्त्रीं हे आदेश बियाः तिनि थ्व ज्या सम्भव जुल। नेपाःया हरेक कुनाय् न्हिंन्हिं धइथें जुइगु थज्याःगु घटनाय् प्रधानमन्त्री थः हे सशरीर उपस्थित जुइ फइगु ला सम्भव हे मदु। थुकिया निंतिं ला राज्यं हे संयन्त्र दयेके माःगु जुइ। वंगु छुं न्हि न्ह्यः हे तिनि नं दुर्गम जाजरकोटय् न्यंगु झाडाबान्ताया महामारी पनेगु छुं संयन्त्र मदयाः सलंसः मनूया ज्यान वन। उगु इलय् नं प्रधानमन्त्री थः हे वासः ज्वनाः जिल्ला ब्वाँय् वनेमाःगु खः। देशय् स्वास्थ्य सम्बन्धी मामिला स्वयेत बिस्कं मन्त्रालय चायेका तःगु दु। उकिया अन्तर्गत थीथी विभाव व परियोजनात सञ्चालन जुयाच्वंगु दु। तर नं सुं छम्ह मनूया ज्यान बचे यायेत प्रधानमन्त्री थःहे न्ह्यचिलेमाःगु खःसा थ्व ति तःधंगु विडम्बना मेगु छु जुइ? राज्य धाथें हे जनताप्रति गम्भीर जुइमाःगु पक्ष थ्व खः ।

More Stories Like this