आत्मनिर्णयया अधिकार बारे

संविधान च्वयेगु ज्याय् आः हानं छगू न्हूगु समस्या पिहां वःगु दु, आत्म निर्णयया अधिकार सम्बन्धी खँय्। संघीय व्यवस्थाय् निर्माण जुइगु प्रदेशतय्त आत्म निर्णयया अधिकार बीगु लाकि मबीगु धइगु खँय् राजनीतिक दलतय् दथुइ विवाद पिहां वःगु दु। खतुं आत्मनिर्णयया अधिकारयात थीथी थासय् थीथी हे कथं परिभाषा बियातःगु खनेदु। नेपाःया सन्दर्भय् केन्द्रपाखें राज्यत छुटे जुया वनेगु अधिकारया रुपय् थुकिया व्याख्या जुयाच्वंगु दु। केन्द्रपाखें राज्यत छुटे जुयाः वने दु धइगु अधिकार बिल धाःसा धमाधम राज्यत छुटे जुया वनी व देश विखण्डन जुइ धइगु चिउताः थुकिया विरोधीतय्सं प्वंकेगु यानाच्वंगु दु। वास्तवय् चिउताः नाजायज मखु। तर आत्मनिर्णयया अधिकार धइगु देश विखण्डन यायेत मखु देशयात अझ क्वातुकेत प्रतिपादन यानातःगु सिद्धान्त खः, थ्व खँयात धाःसा सुना नं ल्वमंके मजिउ। थुकिं हरेक प्रदेशतय्त थःपिं स्वतन्त्र खः धइगु अनुभूति बियाः ज्या यायेत उत्साह बी। आत्मनिर्णयया अधिकार दत धायेवं प्रान्तत छुटे जुया वनी मखु। अले आत्मनिर्णयया अधिकार मदु धायेवं हानं न्ह्यागु हे अवस्थाय् नं प्रान्तत केन्द्रय् प्यपुनाच्वनी नं मखु। यदि केन्द्रपाखें प्रान्तयात पक्षपात यात, दमन यात धाःसा आत्मनिर्णयया अधिकार मदुसां नं प्रान्तं विद्रोह यानाः छुटे जुया वनेत स्वइ। अधिकारया खँ मात्र लिखतय् सीमित जुइ मखु। थ्व ला उगु प्रान्तयात भविष्यय् वनाः केन्द्रं गज्याःगु व्यवहार याइ धइगु खँय् निर्भर जुइ। उकिं आत्मनिर्णयया खँ उलि कपाः स्याका च्वनेमाःगु विषय मखु ।

More Stories Like this