नेवाः मचां हवाईजहाज दयेकल

कृष्ण

भारतया चेन्नईलय् आखः ब्वं वनाच्वंम्ह छम्ह नेपाःमि विद्यार्थीं अन हे ब्वनीपिं मेपिं पासापिंलिसे जानाः न्हूगु कथंया हवाईजहाज दयेकाः क्यना बिउगु दु ।

मोरङया उर्लावारीइ च्वंम्ह छम्ह नेवाः काय्मचां अध्ययनया झ्वलय् थ्व प्रतिभा न्ह्यब्वयादीगु दु। अनया भाजु कल्याण श्रेष्ठं चेन्नईस्थित हिन्दुस्थान विश्वविद्यालयया एरोनोटिकल विभागया मेपिं निम्ह विद्यार्थी लिसे थ्व विमान दयेकूगु खः।
थ्व ज्याय् कल्याणयात ग्वाहालि याःपिं मेपिं निम्ह विद्यार्थी खः जस्टिन जर्ज व किशोर के.। थःपिनि अध्ययनया अन्तिम वर्षय् यानाः क्यनेमाःगु प्रयोगात्मक परिक्षाया झ्वलय् उमिसं थ्व विमान दयेकाः क्यना बिउगु खः। उमिसं दयेकूगु थ्व हवाई जहाजया निंतिं आः न्यागू लाख व च्याद्वः भारु खर्च यायेधुंकूगु दुसा उकियात बांलाक चले यायेगु खःसा मेगु छगू अझ मालीतिनिगु खँ उमिसं धाःगु दु। थुकियात माःगु थ्व दां उमिसं थःपिनि हे 'पकेट खर्चं' मुंकूगु खः।
पेट्रोलं चले जुइगु थ्व विमानयात जुकाकी स्काइराइडर धाइ। थज्याःगु विमान भारतय् सुं नं विद्यार्थीं दयेकूगु थ्वहे न्हापांखुसी खः। अथेहे साढे ७ मिटर ति ताःहाकःगु उगु हवाईजहाज १ मिटर जक तब्या। जहाजया मुक्कं क्षेत्रफल १६८ वर्ग फिट जक दु। मारुती स्टिम कारया इन्जिन तयाः दयेकूगु उगु जहाजय् एल्मुनियम ६०६३ प्रयोग जुयाच्वंगु खः। उकिया मुक्कं वजन धाःसा ६५० किलो दु। ४० लिटर पेट्रोल तये जिउगु थ्व विमान लगातार स्वघौ तक ब्वयेके फइगु खँ उमिसं धाःगु दु। आः तक विमान ब्वयेके मफुनि, आःयात कलेजया ग्राउण्डय् हे उकिया प्रयोग जुयाच्वंगु दु। मेगु छगू लाख ति खर्च याये फत धाःसा जहाज ब्वयेके फइगु उमिगु आशा दु। लिसें उलि प्रयोग यानाः क्यने फत धाःसा भारतया हवाई उडानलिसे सम्बन्धित विभागं सर्टिफिकेट नं बीगु खँ धाःगु दु। थ्व विमान उमिसं न्याला बिकाः दयेकूगु खः ।

थज्याःम्ह विशिष्ट नेवाः ब्यक्तित्वयात छुं ई न्ह्यः तिनि मोरङ्ग उर्लावारीइ स्थानीय नेवाः पुचःपाखें हनेज्या जुल। ज्याझ्वलय् नेवाःतय्गु राष्ट्रिय संगठन नेवाः देय् दबूया नायः नरेश ताम्रकारं वय्कःयात हनादीगु खः। नेवाः न्हू पुचःया नायः चन्द्रबहादुर श्रेष्ठया नायःसुइ जूगु उगु हनेज्याझ्वलय् वय्कःयात हनापौ नापं दोसल्लां न्ययेकूगु खः। कल्याण श्रेष्ठं एरोनोटिकल इन्जिनियरिङय् दकलय् उत्कृष्ट ल्याः हयाः पास यानादीगु खः ।

More Stories Like this