प्रमयात सुदया सुझाव

'चीनय् छुं हे सन्धि याना वये मते'

येँ (सन्ध्या टाइम्स)/प्रधानमन्त्री माधव नेपालं याकनं हे यानादीत्यंगु चीन भ्रमणयात कयाः भारतीय राजदूत राकेश सुदं चिउताः प्वंकादीगु दु। थौं सुथय् प्रम निवासय् प्रम नेपालयात नापलासें राजदूत सुदं थ्व चिउताः प्वंकादीगु खः।
वय्कलं प्रमया चीन भ्रमणया झ्वलय् नेपाः व भारत दथुइ सलंसः दँनिसें दयाच्वंगु स्वापूयात लिच्वः लाइ कथं छुं हे सम्झौता मयायेत 'आग्रह' यानादीगु खँ सीदुगु दु। अथे हे राजदूत सुदं परराष्ट्र मन्त्री सुजाता कोइरालां यानाच्वंगु चीन भ्रमणयात कयाः नं चिउताः प्वंकूगु खँ सीदुगु दु ।

परराष्ट्र मन्त्री कोइरालाया चीन भ्रमणया झ्वलय् सुरक्षा व चीनं नेपाःयात बीगु सुरक्षा उपकरणया खँ चर्चाय् वयेवं भारतीय राजदूतं थःगु सक्रियता क्यंगु अनुमान थन जुयाच्वंगु दु ।

प्रम नेपाललिसे खँल्हाबल्हाया झ्वलय् भारतीय राजदूत सुदं पशुपतिया पुजारी विवादया बारे नं प्रमयात जिज्ञासा तयादीगु खः ।

प्रमं नेपालं धाःसा तराई लागाय् हिंसात्मक गतिविधि न्ह्याकाच्वंपिंसं भारतीय भूमि छ्यलाच्वंगुलिं उमित पनेत भारतं पहल यायेत आग्रह यानादीगु खः। थौंया सहलहय् नेपालय् ब्वलनाच्वंगु राजनीतिक गतिरोधया बारे नं खँल्हाबल्हा जूगु खः ।

अथे हे नेपाः व भारतया खुल्ला सिमानायात व्यवस्थित यायेगु बारे नं सहलह जूगु खँ धाःगु दु ।

उखे प्रमं यानादीत्यंगु चीन भ्रमणयात कयाः भारतीय राजदूत सुदं क्यंगु चिउताःयात सम्बन्धित विज्ञतय्सं धाःसा अर्थपूर्ण रुपं काःगु दु ।

थौं हे भारतीय उद्योग वाणिज्य संघया प्रतिनिधिमण्डलं नं प्रधानमन्त्री नेपालयात नापलाःगु दु। उगु इलय् भारतीय व्यापारीतय्सं थःपिं नेपालय् लगानी याये चाहे जूगु खँ कँसें उचित वातावरण दुसा थःपिं लगानी यायेत तयार दुगु खँ धाःगु खः। लिसलय् प्रम नेपालं भारतीय व्यापारीतय् सुरक्षाया ग्यारेन्टी बीत सरकार तयार दुगु जानकारी याकादीगु खः ।