मोबाइल मुयाः मनू सित

खल्ती खल्तीइ मोबाइल घाइपिं होशियार

येँ (सन्ध्या टाइम्स)/मनूतय् सुविधाया लागिं आविष्कार जूगु मोबाइल आः सुविधाया वस्तु जक मखु, ज्यान हे काये फइगु घातक ज्वलं नं साबित जूगु दु। म्हिगः नेपालगञ्जय् खल्तीइ घाना तःगु मोबाइल मुयाः छम्ह प्रहरीं सीवं खल्ती खल्तीइ मोबाइल भ्याना जुइपिं मनूत थारान्हूगु दु।
नेपालगञ्जया कारखाँदो धाःगु थासय् च्वंगु क्षेत्रीय प्रहरी अस्पतालय् ज्या याइम्ह प्रहरी परिचर दलबहादुर रोका उकथं मोबाइल मुयाः सीगु खः। वयागु लाश स्थानीय लग्दहवा धाःगु थाय्या सतकय् लूगु खः। थः छेँय् वयेत्यना धकाः मोबाइलं खँ ल्हाःगुया छुं ई लिपा हे वयागु मोबाइल मुया वःगु खँ धाःगु दु। कमिजया खल्तीइ तयातःगु मोबाइल मुया वःगुलिं वयात नुगःचुइ हे लिच्वः लाःगु जुइमाः धकाः अनुमान याःगु दु। वयागु म्हुतुं हि नं वयाच्वंगु खँ स्थानीय मनूतय्सं धाःगु दु ।

मंगलवाः बहनी वयागु मोबाइल मूबलय् अन गोलीं कयेकू थेंज्याःगु सः पिहां वःगु खः। उकिं स्थानीय मनूतय्सं वयात सुनां नं गोलीं हे कयेकाः स्याःगु जुइमाः धकाः अनुमान याःगु खःसां प्रहरीपाखें याःगु प्रारम्भिक अनुसन्धानं धाःसा वयागु मृत्यु मोबाइल मुयाः हे जूगु खः धकाः ठहर याःगु दु।
वयागु लाशया जःखः मोबाइलया टुक्रात नं उखेंथुखें लानाच्वंगु लूगु दु ।

मदुम्ह रोकां ब्राण्ड सी मदुगु चाइनिज मोबाइल सेट ज्वनातःगु खँ वया सतीपिंसं धाःगु दु। प्रहरीं थुकिया बारे अझ दुग्यंक अनुसन्धान याइगु खँ नं सीदुगु दु।
छुं दँ न्ह्यः तिनि भारतया थीथी शहरय् नोकिया कम्पनीया मोबाइल सेट मुया वःगु समाचारत पिहां वःगु खः ।