महाशक्ति चीनपाखें फक्व लबः काये

भारतया 'सफल' भ्रमण लिपा नेपाःया मेगु जःलाखःला देय् चीनलिसे स्वापू बांलाकेगु ताः तयाः परराष्ट्र मन्त्री सुजाता कोइराला उखे झाःगु दु। नेपालय् न्ह्याम्ह हे सरकार वःसां दकलय् न्हापां भारतया भ्रमण यायेगु व वयां लिपा नं यदि सत्ता टिके जुयाच्वन चीन छक्वः नं वना वयेगु परम्परा दु। प्रधानमन्त्री माधव नेपालं पूवंकादीत्यंगु थ्वहे परम्पराया लागिं माःगु तयारी यायेत परराष्ट्र मन्त्री चीन झाःगु खः।
वंगु छुं दँ न्ह्यवंनिसें चीनं नं नेपाः मामिलायात सतिक च्वनाः स्वयेगु याना हःगु दु। थुकिया कारण नेपालय् अनावश्यक रुपं अप्वयावःगु अमेरिका व भारतया अभिरुची खः। भारत सिबें नं अमेरिकां नेपालय् क्यना हःगु अतिरिक्त रुचीं चीनयात सतर्क याना बिउगु खने दु। अले नेपाः मामिलाय् चीन सतर्क जुल धकाः भारत व अमेरिका हानं अप्वः सतर्क जूगु थौंया अवस्था खः। उकिं थौं नेपाः चीन, भारत व अमेरिका स्वंगुलिं देय्या शंकाया घेराय् लानाच्वंगु दु। थज्याःगु अवस्थाय् नेपाःया परराष्ट्र मन्त्रीं यानादीत्यंगु चीन भ्रमण महत्वपूर्ण जुइगु खँय् शंका मदु ।

उकिसनं थौं विश्व मानचित्रय् चीन छगू न्हूगु महाशक्तिया रुपय् उदय जुयाच्वंगु देय् खः। थज्याःगु देय्या जःलाखःला जुयां नं नेपालं चीनपाखें छुं हे लबः मकायेगु खःसा थ्व नेपाःया तःधंगु दुर्भाग्य जुइ। नेपाःया सत्ता व राजनीतिक पार्टीतय्सं चीनपाखें फक्व लबः कायेगु कुटनीति सिर्जना याये फयेकेमाःगु दु। सुजाता कोइराला यदि थ्व ज्याय् ताःलाःसा वय्कःया चीन भ्रमणयात सफल धायेमाली ।

More Stories Like this