सिसडोल ल्याण्डफिल्ड जाल आः आलेटार ल्याण्डफिल्डया पाः

राजधानीं करीब स्वीगू किलोमिटर तापाक च्वंगु ओखरपौवाया सिसडोल ल्याण्डफिल्ड साइट छवाः न्ह्यःनिसें जाये धुंकूगुलिं आः वयां भचा क्वय् निर्माण पुवंकूगु आलेटार ल्याण्डफिल्ड साइटय् येँ महानगरपालिका व यल उपमहानगरपालिकां यंकूगु फोहोर वायेगु ज्या शुरु जूगु दु।
येँ महानगरपालिकां स्थानीय विकास मन्त्रालयनाप जानाः अन झिंच्याला तक फोहोर वायेगु व्यवस्था मिले यायेत आलेटार ल्याण्डफिल साइट दयेकूगु खः। आः उगु साइटय् नं छवाः न्ह्यःनिसें येँ व यलया फोहर क्वफायेगु व डोजरं धमाधम चां ल्हाकेगु ज्या नं न्ह्यायेधुंकूगु दु। वंगु भाद्र १५ गते सोमवाःनिसें थुगु साइटय् ज्या न्ह्याकूगु खः ।

थन तगाः जुइक गाः म्हुयाः उकी प्रशस्त फोहोर वाये जीकेगु निंतिं न्हापां प्यखरें पःखाः दयेकाः उगु पःखालं लः तकं मज्वइगु यानाः सिमेन्टं ढलान यानातःगु दु। नापं जमीन सतहय् नं वाटर प्रुफया बन्दोबस्त यानातःगु दु। फोहोरं पिहां वइगु नवःगु व रसायनयुक्त झोल खुसिइ मवनेमा धकाः अथे यानातःगु खः। अन दुने ड्रमत थाय्थासय् तयाः उकिं हे ग्याँस पिकायेगु बन्दोबस्त यानातःगु दु। छुं नं कथंया झोल मज्वइगु यानाः प्लास्टरय् प्लाष्टिक थेंज्याःगु टार्पेनया बन्दोबस्त यानातःगु दु। थज्याःगु बन्दोबस्त सिसडोल ल्याण्डफिल्डया निर्माण जूगु इलय् नं दयेकूगु खः। तर आः अन खालि फोहोर जक वायेगु जुयाच्वंगुलिं तसकं नवयाः उगु थासय् वये-वने याइपिंत तसकं हे मछिनाच्वंगु दु। उलि जक मखु कि अन झोल नं बाः वनाः खुसि हे ल्वाक ज्यानाच्वंगु दु। थुकथं अनया फोहोर खुसिइ ल्वाकज्याइगु धइगु इन्जिनियरिङ पक्षया असफल योजना खः।
डम्पिङ हे जक यानाच्वंगुलिं यानाः अन प्लाष्टिक वा मेमेगु ध्वमगीगु फोहोरत अलग्ग यायेगु नं छुं हे व्यवस्था यानातःगु मदु। खालि न्ह्यागु फोहोर वःसां तप्यंक वायेगु यानाच्वंगु दु। ध्वगीगु व ध्वमगीगु फुक्कं छथाय् लानाच्वंगुलिं नं अन वनेगु इलय् तापाकंनिसें हे च्वनां च्वने मजीक नवयाच्वंगु खः। ओरखपौवाया मेगु निर्माणाधीन डम्पिङ साइट धाःसा उकिं २ किलोमिटर तापाक धादिङ जिल्लाय् दु। सिसडोल व आलेटार ल्याण्डफिल्ड साइट धाःसा सिमानां येँ जिल्लाय् हे लानाच्वंगु दु। येँनं धादिङ अलग्ग जुइगु खुसि लिक्क हे उगु निगू डम्पिङ साइट तयातःगुलिं थनं वइगु झोल विषादीयुक्त जुल धाःसा अन दुपिं आपालं न्या व मेमेपिं जलचर म्वाःम्वाकं हे सीगु खँय् छुं विवाद हे मदु ।

पोखराय् थज्याःगु हे तःधंगु ल्याण्डफिल्ड साइटया सफलता लिपा सिसडोल व आलेटार परियोजना हःगु खः। प्यदँ तक न्ह्याःगु थ्व परियोजना सञ्चालन अवधि दुने स्थानीय जनतां थीथी माग तयाः आः तक १९६ न्हु थन फोहोर वायेगु हे अवरुद्ध यायेधुंकूगु दु। अथे खःसां आः तक नं स्थानीय जनतां धयाच्वंगु लँ पीच यायेगु, लः धः व रोजगारी चूलाकेगु थेंज्याःगु मागत पूवंके फुगु मदुनि। आन्दोलन जुल कि सम्झौता यानाः हस्ताक्षर यानातःगु भ्वंया चाङ धाःसा मन्त्रालयय् पँ चिउँगु चिलं तुं जुयाच्वंगु दु। झिंच्यालाया निंतिं चले यानाच्वंगु आलेटार ल्याण्डफिल्ड साइटया जुनियर इन्जिनियर खतबहादुर गुरुङं अन न्हिं सछिगू टिपया ल्याखय् फोहोर वायेगु यानाच्वंगु खँ कनादिल। उकी ह्याउँगु गाडी झिंन्हय्गः, तग्वःगु गाडी नीनिगः, टिपर न्यागः निरू स्वरू तकं वयेगु याः। थुलि तापाःगु थासय् तयेयंकल नं थपाय्सकं तच्वःगु विवाद व मागया सामना यायेमाःगुया लिउने छुं राजनीतिक कारण अवश्य दयेफु धइगु उगु डम्पिङ साइटय् ज्या याइपिंसं धाःगु दु ।

More Stories Like this