स्यना वनाच्वंगु कांग्रेस-एमाले स्वापू

सरकारया नेतृत्व यानाच्वंगु पार्टी नेकपा (एमाले) व उकियात साथ बियाच्वंगु प्रमुख दलया सभापति गिरिजा प्रसाद कोइरालाया स्वापू तसकं हे बांमलाये धुंकूगु जुयाच्वन। उकिया दकलय् खायूगु दसु म्हिगः खने दत जब प्रधानमन्त्री माधव नेपाल भाजु कोइराला नापलाये धकाः वय्कःया छेँय् वनं नं वय्कलं नापलाये मखु धकाः अथें लित छ्वया हल। छम्ह प्रधानमन्त्रीया निंतिं थ्व ति तःधंगु अपमान मेगु छु जुइ ?

थुकिया लिउने कोइरालां थः म्ह्याय् सुजातायात उप्रधानमन्त्री दयेकि धकाः बिउगु आदेशयात प्रम नेपालं पालना मयाःगु हे दकलय् प्रमुख कारण खः। सुजातायात उपप्रम दयेके लाकि मदयेके धकाः प्रमं कोइरालायाके न्यनेगु पलेसा कांग्रेसया मेपिं नेतातलिसे सल्लाह याना जूगुयात कोइरालां सहः मयाःगु जुइफु। कांग्रेस धइम्ह हे कोइराला खः। माधव नेपालं थ्व खँ ल्वःमंकूगु खने दत। उकिसनं माधव नेपालयात प्रधानमन्त्री दयेकाम्ह हे थः खः धइगु दम्भ ला
कोइरालायाके दुगु हे जुयाच्वन। उकिं प्रधानमन्त्रीं हाछिकाः जक तयेगु खःसां नं थःके न्यनेमाः धइगु मान्यता वय्कलं लहिना तःगु दु। थुपिं हे कारणं यानाः कोइराला माधव खनाः तम्वयाच्वंगु खः। थ्व नितान्त व्यक्तिगत कारण खः। मखुसा कोइरालां बजाःभाः नियन्त्रण मजूगु खँय्, संविधान च्वयेगु ज्याय् गति मकाःगु खँय् वा जनतायात राहत मबिउगु खँय् प्रमयात सचेत व सतर्क यायेमाःगु खः। अज्याःगु छुं नं मयाः। व्यक्तिगत स्वार्थया कारणं स्यनावंगु सत्तारुढ दलतय् थ्व स्वापुतिं गठबन्धन छ्वासुया वनीगु निश्चित हे खः ।

More Stories Like this