नीन्यादँनिसें दबुली

सुनिता मानन्धर

थनिं नीन्यादँ न्ह्यवंनिसें नेपालभाषा नाटक ख्यलय् दी मय्जु अन्नपूर्णेश्वरी श्रेष्ठ। दकलय् न्हापां 'हाकु स्वाहाने' नाटकय् म्हिताः वय्कः थ्व ख्यलय् दुहां झाःगु खः ।

खय्तला वय्कलं ने.सं. ११०२ लय् हे नाटक म्हितादीगु खः। वयां दछि लिपा स्टेज नाटकय् म्हितादिल। अबलय् न्ह्यागु भूमिकाय् नं मिजंपिं जक च्वनीगु। मिसा पात्र दुसां मिजंयात हे मिसा दयेकी। अज्याःगु इलय् मिसा जुयाः दबुली दंझाःम्ह खः वय्कः। पुलांगु खँ लुमंकाः कनादी, 'लुभुइ दँय्दसं मोहनि न्ह्यः दबू प्याखं क्यनीगु। जि पासानाप स्वः वनेगु। छन्हु पासाया पाजुं जितः दबू प्याखनय् च्वनेगु ला धकाः न्यन। जिं च्वने धया। जिगु न्हापांगु प्रतिभा अन हे न्ह्यब्वया।'
वय्कःया छेँय् नाटकनाप स्वापू दुपिं सुं नं मदु। नेपाल टेलिभिजनया टेलिप्याखं स्वस्वं हे वय्कः प्रभावित जुयाः नाटकय् वःगु खः ।

नेपालभाषाया नाटक विकास यायेगु ताः तयाः अबलय् बेनु शाक्यं घिन्तांमुनि पुचः चायेकादीगु खः। थुगु पुचःपाखें नं वय्कलं निगू ख्यालः म्हितादिल। लिपा थ्व पुचः निष्त्रि्कय जुल। पलिस्थां ख्यालः कासा यायेवं वय्कः हानं सक्रिय जुयादिल ।

खस भाय्या जुइमा वा नेवाः भाय्या जुइमा, नाटय् वय्कलं उलि हे वास्तविकता ब्वयादी। नाटकय् मिसा पात्रयात ज्यान बीगुली वय्कः न्ह्यःने लाः। वय्कः दुहां वयेवं दबुली ज्यान दुबी। दकलय् न्हापां 'हाकु स्वाहाने' म्हितूबलय् ला भचा थाकुगु खः। अबलय् वय्कलं शुद्धं नेवाः भाय् नं ल्हाये मसः। उकिं निला तक रिहर्सल यायेमाल।
खतुं वय्कः पर्दाया प्याखनय् नं मदुगु मखु। तर वय्कःयात अप्वः दबू प्याखं हे यः। पर्दाय् निश्चित एंगलं पिहां वनी धकाः ग्यायेमाः, दबुली थः यत्थे म्हिते दु ।

पलिस्थापाखें ग्वसाः ग्वःगु ख्यालः कासाय् वय्कलं महेश जोशीं स्यनादीगु 'काकाकाका' ख्यालकय् तरकारी साहुनी जुयाः म्हितादीगु खः। उगु ख्यालः लिपा वय्कः नेपालभाषा ख्यलय् सकस्यां निंतिं हे 'तरकारी साहुनी' जुयादिल।
इमेज च्यानलं न्ह्याकाच्वंगु 'ख्वतबजि' इ वय्कलं म्हितादीगु दु। ख्वताबजिइ जन्तर तताजु जुयाः वय्कलं म्हितादीगु भूमिकायात सकसिनं ययेकूगु दु। कला क्षेत्रय् प्रवेश जूगु नीन्यादँ क्यंगु लसताय् ख्वताबजि पुचलं हे वय्कःयात थुगुसी विशेष रुपं हनेज्या नं यायेत्यंगु खँ सार्वजनिक जूगु दु ।

नकतिनि क्वचाःगु ख्यालिगुलु गुथिया ख्यालिन्हिलि ज्याझ्वलय् नं वय्कलं म्हितादीगु खः ।

नेपालभाषाया नाटकय् म्हिताः छुं कथंया पारिश्रमिक बीगु व्यवस्था मदु। अथे जूसां छम्ह नेवाः जुयाः थःगु भाय्या नाटक विधा थकायेमाः धकाः वय्कलं आः तक दबू त्वःतादीगु मदुनि ।

नाटकय् म्हिताः वय्कलं बेस्ट अवार्ड नं तःक्वः हे त्याकादीधुंकल। 'काकाकाका' ख्यालकय् वय्कः उत्कृष्ट मिसा ख्यालःम्वः जुयादीगु खः। कला ख्यलय् छगू दशक सेवा याःगु वापत वय्कःयात रंगश्रष्टा यलं सम्मान नं याःगु दु।
नाटकया नापनापं थौंकन्हय् वय्कः जेम्स स्कूलय् डान्स टिचर कथं ज्या नं याना च्वनादीगु दु ।

More Stories Like this