मयः धयां छु याये !

प्रा. नर्मदेश्वर प्रधान

जि मचाबलय्। मनोरञ्जनया साधन उलि मदु। फिल्म। मुख्य मनोरञ्जनया ख्यः। निगू प्यंगू हल। हिन्दी फिल्म जक। जितः फिल्म स्वये मयः। तर फिल्म स्वयेगु मौका खुब वइगु। करं हे वनेगु। जिमि बा खुब फिल्म स्वयेमाः। ब्वना यंकी। स्वये। ध्यान वनी मखु। म्येँ वइ। न्यने। न्ह्याइपुइ। फिल्मय् रोमान्स दयाच्वनी। थः उलि उमेर दइ मखु। गाक्क ल्याय्म्ह मजूनि। हिरो हिरीनीत सनी। स्वये। दुग्यंक अर्थ थुइके मफुनि। द्यःनें द्यःनें मज्जा काये। बस थुलि हे ।

उबलय् हलय्। फोर्त, थर्ड क्लास धयागु नं दु। दंगु। आपाः ध्यबा मपुलीपिं अन च्वनी। स्वइ। छता खा लुमं। थौंकन्हय् थें उबलय् फिल्मय् 'उष्ण दृश्य' मक्यं। लभ दृश्य दइ। रोमान्स दइ। तर प्रस्तुति शैली पाः। थौंकन्हय् थें छ्याङ्ग जुइ मखु। परोक्ष जुइ। हिरो हिरीनीत नाप लाइ। रोमान्स याइ। तर म्हय् म्हय् थियाः सनीगु खुल्ला दृश्य क्यनी मखु। मत फ्वाक्क स्याना बी। पर्दां किका बी। दृश्यं रोमान्स पिज्वइ। स्वइपिंत थुलिं हे थी। प्रभाव लाकी। फोर्थ व थर्ड क्लासय् च्वंपिं दर्शकतय्सं सिटी पुया हइ। अय् अय् अय् हाली। लापा थाइ। हय् हय् हय्। रोमाञ्चित जुइ। प्रतिक्रिया प्वंकी। थौंकन्हय्या ल्याखं व दृश्य छुं तःधंगु मखु, अति साधारण। थौंकन्हय् बेड सीन क्यनी। हिरो हिरोनीत खिचा सं थें सनी। मामुली जुइ। अंग प्रदर्शनया सीमा दइ मखु।
यायाः पुन्हि। ख्वपं हइगु महाकाली प्याखं स्वये नं। उकी ख्याः प्याखं क्यं। निम्ह ख्याः छग्वारा चिनी। तुलाः वनी। बल थें। थौंकन्हय् फिल्मय् हिरो हिरोनीत सनीबलय् ख्याः प्याखं लुमनी। निम्हं छम्ह। छधी जुइ। छम्ह ला निम्ह ला छुटे याये फइ मखु। उखुन्हु तिनि जिं अखबारय् छपाः किपा खना। छगू सिनेमाया लु। राजेश हमालं हिरोनीयात बाकाइदा चुम्बन यानाच्वंगु। निम्हेस्यां म्हुतुसि म्हुतुसि द्यतनाच्वंगु। फोकस यानातःगु किपा। नेपाली सिनेमाय् कामुक लु ल्याःचाः मदयेधुंकल। न्ह्यागु दृश्य बीत नं हिरो हिरोनीत तयार। दर्शकतय्त थौंकन्हय् गरम दृश्यत पचे जुइधुंकल। उमित उकिं मपू। हलय् सिटी पुइगु। लापा थायेगु। अय् अय् अय् धकाः दर्शकत महाले धुंकल। न्ह्याथें ज्याःगु दृश्य खंसां। फिल्मय् छु खा। लाय् लाय् हे ल्यासे ल्याय्म्हत फिल्मी शैलीं जुइ। गरम मुद्राय् जुइ। म्हिगः थें मखु। थौं सुनां नं सुयातं चिउताः मतये धुंकल। कपाः स्याका मच्वन ।

थौंया परिवर्तनय् छता खा खंके फइ। फिल्मय् जक मखु। अंग प्रदर्शन। यौन वासना। हरेक ख्यलय् महत्वपूर्ण खने दइ। नसा ज्वलनय् चि-चिकं थें। मसला थें। पत्रपत्रिका स्वये। म्यागाजिन्सत पिहां वइ। विज्ञापनत दइ। अन्तर्वार्ता वइ। गनं गनं वहे खा हइ। अज्याःगु हे किपात ब्वइ। फिल्मी कलाकारत लिसे जक मखु। नेता, साहित्यकार नापं अन्तर्वार्ता काइ। तीजक प्रसंग हइ। ''ब्याहाः न्ह्यः छि सुं लिसे शारीरिक सम्पर्क वःगु दु ला?'' मिसात जूसा मेगु हे कथं न्ह्यसः तइ। ''सेक्स बारे छिगु छु धारणा दु?'' गुलिसिनं लिसः बी - 'ईश्वरया वरदान'। गुलिसिनं मछालाः धाइ - 'मदयेक मगाःगु का ... ...।' सेक्स छु? स्पष्ट यायेत छम्ह हिरोनीयात न्यनी। हिरोनी नं लिसः बी - 'कपाः स्याइबलय् नयेगु सिटामोल खः सेक्स।' सिटामोल नयेत डाक्टरया प्रेसक्रिप्सन म्वाः। सुनां नं स्वतन्त्र कथं न्यायेफु। सिटामोल न्यायेत वासः पसलय् हे वनेम्वाः। जाकि बजि पसः, तरकारी पसलय् नं दइ। न्यायेफु। थ्व अत्यावश्यक वासः जुइ धुंकल। घरिघरिइ मनूतय्त कपाः स्यानाच्वनी। पाकापुकु सिटामोल नयेगु मनूतय् बानी थें जुइ। कपाः स्याइबलय् नयेगु सिटामोल खः सेक्स। हिरोनी मय्जुया सेक्सया व्याख्या। थौंया सन्दर्भय् तसकं सटिक खने दइ। नेपाल टिभीइ पवनकलीं न्ह्याकीगु छगू ज्याझ्वः दु। पवनकली ग्रामीण मिसा। ग्रामीण भेसय्। ज्याझ्वलय् वं नांजाःपिं मिसा मिजंत हइ। खाल्हाबल्हा याइ। न्ह्यसः तइ। वयागु न्ह्यसलय् थ्व छगू अनिवार्य जुइ-एस-ई-एक्स। सेक्स वयागु अन्तर्वार्ताया मसला जुइ। थ्व मसला शैलीं थौंकन्हय् फुक्क ख्यलय् प्रभाव याना हइ। वल वल वहे फसिक्वाः धइथें ।

जिं छपु बाखं च्वयेगु क्वःछिना। भचा पाःगु। सकसियां धाइ - बाखं च्वयां छु याये ! वहे खा लिसा लिसा। न्हूगु विषय वस्तु। न्हूगु शैली बाखनय् हयेमाः। धापू खः थें ताइ। बिचाः याये। गय् यानाः च्वये। न्हू कथंया बाखं ।

छपु बाखं लुमंके। विषय मतिना हे जुइ। अन नायक नायिका दइ। ल्याय्म्हपिं। अविवाहित। प्रेम आकर्षणय् दुनाच्वंपिं। थ्व ला पुलां ताल हे जुल। थज्याःगु बाखंचु दुगु बाखं बजारय् यक्व दु। थुलिं बाखं गय् न्हूगु खने दइ। मतिइ लुइ। थ्वयात न्हूगु ढंगं प्रस्तुत यायेमाः। आकर्षण थनेमाः। बाखंयात न्हू सवाः बीगु जिं निर्णय याये। बाखनय् प्रेम दइ। तर नायक नायिका अन फिल्मी शैलीं सने दइ मखु। बाखंज्वःछि उपिं नाप लाये फइ। तर न्याकु तापाक च्वनाः जक। बाखं थुकथं न्ह्याके। नायक नायिकां म्हय् थीगु इच्छा व्यक्त याइ। तर बाखंयात थुकथं मोड बी। शारीरिक सम्पर्कय् वयेगु उमित चान्स हे दइ मखु। मेगु ला छु ... ल्हाः ज्वनेगु तक नं मौका लुइ मखु। नायक नायिकायात न्याकु हाकः तापाक तयाः हे बाखं क्वचायेका बी। खिचा थें सनीगु फिल्मी घटना थौंकन्हय्या बाखंया धाः। तर शारीरिक स्पर्शविहीन जिगु
बाखं। जिगु बाखं जरुर न्हूगु जुइ। लुमंलुमं जितः सन्तोष जुइ ।

थौंकन्हय् बर्डफ्लुया प्रकोपया खा वइ। रोगं बचे जुइगु उपाय बी। ल्हाः मिले याये मते। चुम्बनपाखें तापाक च्वा। अभिवादन याये माःसा 'नमस्ते' पाय्छि जुइ। म्हुतुइ माक्स तयाः चुम्बन यानाच्वंगु तस्वीरत खनी। ल्हातिइ पञ्जा अनिवार्य जुइ। बर्डफ्लु नं जिगु बाखंयात जीवन्त याना बी। जितः अनुभव जुइ। मुस्मां देशय् मिसातय्सं बुर्का फी। म्ह छम्हं त्वपुइ। खुल्ला समाजं बुर्काया विरोध याइ। रुढीवादी खंकी थ्वयात आधुनिकवादीतय्सं। तर विश्वय् थौंकन्हय् किसिम किसिमया ल्वय् वयाच्वंगु दु। ल्वचं बचे जुइत थौं म्हुतुइ माक्स तये माली। ल्हातिइ पञ्जा अनिवार्य जुइ। आः अज्याःगु ल्वय् मवइ धाये फइ मखु। गुकिं बचे जुइत नकाब अनिवार्य जुइ। बुर्का फी हे माली। ल्वचं सुरक्षित जुइत। उबलय् रुढ पुलां बिचाःया खा जुइ मखु। न्हून्हूगु ल्वचं मनूतय्त मतिइ लू थें लसपस याये सम्भव मजुया बी। अले एस 'ई'एक्सं (सेक्सं) ला हिलेमाली। विना बुर्कां प्रेम याये जी मखु। मयः धयां छु याये।

narapradhan@yahoo.com

More Stories Like this