प्रमया मुँज्याय् मवनेत उर्दी
....वन धाःसा भौतिक कारवाहीया ख्याच्वः
येँ (सन्ध्या टाइम्स)/थौं साक्षरता दिवसया लसताय् जुइगु छगू ज्याझ्वलय् ब्वति कायेत पश्चिमया महेन्द्रनगर झायाच्वंम्ह प्रधानमन्त्री माधव नेपालया ज्याझ्वःयात माओवादीं बहिष्कार याःगु दु। नापं प्रधानमन्त्री नेपालया ज्याझ्वलय् सुनां नं ब्वति काल धाःसा वयात जनकारवाही यायेगु ख्याच्वः नं उमिसं बिउगु दु ।
प्रधानसेनापति प्रकरणय् राष्ट्रपतिं ल्ह्वंगु पलाःया विरोधय् राष्ट्रपति व प्रधानमन्त्री निम्हेसितं बहिष्कार याना वयाच्वंगु एनेकपा (माओवादीं) थौं प्रम नेपालयात सार्वजनिक ज्याझ्वलय् बहिष्कार यायेत्यंगु खः ।
साक्षारता दिवसया लसताय् थौं महेन्द्रनगरंनिसें छगू साक्षारता अभियान शुरु यायेत्यंगु खः। महेन्द्रनगरनिसें वयाः येँय् थ्यंकीगु उगु अभियानया उलेज्या यायेत प्रम नेपाल थौं महेन्द्रनगर थ्यंकः झाःगु खः। अन जुइगु वय्कःया कार्यक्रमयात माओवादीं धाःसा बहिष्कार याइगु जूगु दु। लिसें मेपिंत नं प्रमया ज्याझ्वलय् ब्वति काये मते धकाः माओवादीं सार्वजनिक रुपं आह्वान यानाच्वंगु दु। यदि सुनां नं ज्याझ्वलय् ब्वति काः वन धाःसा वयात भौतिक कारवाही यायेगु ख्याच्वः समेत स्थानीय माओवादी कार्यकर्तातय्सं बियाच्वंगु दु ।
माओवादीया ख्याच्वलं यानाः प्रमया ज्याझ्वलय् ब्वति काः वनीपिं सर्वसाधारणया उपस्थिति तसकं न्यून जक जुयाच्वंगु दु ।
उखे स्यांजाया छगू ज्याझ्वलय् ब्वति काः वंम्ह सञ्चार मन्त्री शंकर पोखरेलयात अनया माओवादी कार्यकर्तातय्सं हाकुगु ध्वाँय् क्यंगु दु। पोखरां स्यांजा वनाच्वंगु इलय् वय्कःयात हाकुगु ध्वाँय् क्यंगु खः। स्यांजाय् जूगु कार्यक्रमय् न्ववासें वय्कलं माओवादीं निषेधया राजनीति यानाः देय्यात न्ह्यःने वनेगुपाखें पनेगु ज्या यानाच्वंगु द्वपं बियादिल ।
