कोइरालां प्रधानमन्त्रीयात नापमलासे लित छ्वया हल
येँ (सन्ध्या टाइम्स)/नेकां सभापति गिरिजाप्रसाद कोइरालां थौं सुथय् थःत नापलाः वःम्ह प्रधानमन्त्री माधवकुमार नेपालयात नाप हे मलासे अपमानित यानाः लित छ्वयाहःगु दु ।
प्रधानमन्त्री नेपाल थौं सुथय् सभापति कोइरालायात नापलायेत वय्कःया निवास महाराजगञ्जय् वंगु खः। तर प्रधानमन्त्री वल धालं नं कोइराला तलेया क्वथां कुने कुहां मवः। कोइराला कुहां वइ व नापलाये धकाः प्रम नेपाल झिगू मिनेट तक कुने हे पियाच्वन। अय्नं कोइराला कुहां हे मवसेंलि प्रम नेपाल अथें हे अपमानित जुयाः लिहां वंगु खः।
न्हूगु मन्त्रिमण्डलया शपथ ग्रहणया लिसें सरकारया सछिन्हुया ज्याझ्वः सार्वजनिक यायेगु ज्याझ्वलय् तकं कांग्रेसया मन्त्रीतय्सं ब्वति मकायेवं थुकिया बारे सहलह यायेत प्रम नेपाल कोइराला निवास झाःगु खः ।
वर्तमान सरकारया डिजाइन दयेकूम्ह कोइरालां थः म्ह्याय् सुजाता कोइरालायात उपप्रधानमन्त्री दयेकेगु थःगु प्रस्तावयात प्रम नेपालं स्वीकार मयायेवं प्रम खनाः तं पिकयाच्वंगु खःसा थ्वहे दथुइ सरकारं थीथी देय्या राजदूत नियुक्ति व सरकार विस्तार यायेगु झ्वलय् तकं थःके छुं नं कथं सल्लाह मयाः धासें तं प्वंकेगु यानाच्वंगु खः। प्रम नेपालं उकुन्हु यानादीगु भारत भ्रमण लिपा थःथाय् वयाः उकिया ब्रिफिङ्ग मयाःगु खँय् नं कोइराला तम्वयाच्वंगु दु। बरु माओवादीया पुलांम्ह प्रधानमन्त्री प्रचण्डं भारत भ्रमणं लिहां वयाखतं कोइरालायात नापलानाः ब्रिफिङ्ग यानादीगु खः। थुकिं यानाः कोइराला व प्रमया स्वापू झन् हे ख्वाउँया वंगु खः ।
स्यनावंगु स्वापू बांलाकेत प्रम नेपाल थौं सुथय् कोइराला नापलायेत महाराजगंज वंगु खःसां कोइरालां थः प्रमलिसे खँ ल्हायेत इच्छुक मदु धासें अथें लित छ्वयाहःगु खः।
कोइरालां नापमलासे लित छ्वयाहःगुयात सरकारं उसाँय् मदयाः नापमलाःगु धकाः प्रचार याःगु दु ।
