पुजारी नियुक्तिइ तकं भारतया हस्तक्षेप
नेपाःया धार्मिक ख्यलय् नं भारतया राजनीतिक हस्तक्षेप अप्वया वःगु दु। पशुपतिइ पुजारी नियुक्त यायेगु सवालय् जूगु विवादय् भारतया विदेशमन्त्रीं समेत थःगु बिचाः प्वंकुसें अन भारतीय पुजारी हे नियुक्त यायेमाः धकाः दवाव बियाहःगु दु। थुखे नेपालय् भारतीय राजदूत थः हे सक्रिय जुयाः भारतीय पुजारीतय् सुरक्षा जुइ माल धकाः सरकारया गःतां ज्वनाच्वंगु दु ।
नेपाःया गुगुं नं देगलय् गनयाम्ह पुजारी नियुक्त यायेगु धइगु नेपाःया आन्तरिक मामिला खः। पशुपतिइ भारतीय पुजारी हे नियुक्त यायेमाः धइगु जरुरी मदु। यदि इतिहास हे पुइकाः स्वयेगु खःसा अन भारतीय पुजारी वये स्वयां नं न्ह्यः नेवाः ब्रम्हूतय्सं पुजारी जुयाः ज्या यानाच्वंगु खः। उकिं नेपाःया गुगुं नं देगलय् भारतीय पुजारी नियुक्त या धकाः दवाव बीगु छुं हे अधिकार भारतयाके मदु। थ्व नेपाःया आन्तरिम मामिलाय् समेत याःगु हस्तक्षेप खः। छम्ह पुजारी नियुक्त यायेगु सवालय् समेत भारतं थुलि दवाव बिउगु व उकियात नेपाःया शासकतय्सं छ्यं क्वछुकाः स्वीकार याःगु स्वयेबलय् आः नेपाःयात विश्वया छगू सार्वभौमसत्ता सम्पन्न मुलुक धायेत नं झी मछालेमाःगु स्थिति वःगु दु। गन तक भारतया नं थीथी देगलय् नेपाली पुजारीत दु धइगु खँ दु, उमित छु यायेगु धइगु भारतया थःगु मामिला खः। उमिगु हवाला बियाः नेपालय् ल्हाः तः वये दइ मखु। पशुपतिइ गबलय् तक भारतीय पुजारी दयाच्वनी अबलय् तक भारतया हस्तक्षेप नं कायम हे जुयाच्वनी, उकिं भारतीय पुजारी चीकेगु झन् हे हथाय् जूगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
