भविष्य दर्पण

अनाम

मनूया भविष्य सिउपिं, कनेफुपिं सुं मनूत संसारय् दइ ला? थ्व नं विश्वासया खँ जुल। विश्वास याइपिंसं थीथी ज्योतिष, धर्मगुरु वा अन्य द्यःमांपिं आदिपिंसं धाःगु खँय् विश्वास याइ। छि पत्याः मजूसा थौंकन्हय् न्हिंन्हिं कान्तिपुर टेलिभिजनय् छिगु भविष्य क्यनेगु ज्याझ्वः न्ह्यानाच्वंगु दु। छकः कुतः यानाः स्वयेगु खः ला? भविष्य दर्पण ।

जितः ला विश्वास मदु। कान्तिपुर टेलिभिजनय् उगु ज्याझ्वः वल कि जि ला कान्तिपुर टेलिभिजन मस्वसे मेगु हे च्यानल स्वयेगु। मनूया वर्तमान भविष्य ब्रम्हा विष्णु महेश्वर थेंज्याःपिं द्यःपिंसं ला मसिउ धाःसा मनूया खँ विश्वास याये बहः जुइ ला? सुं नं न्हापा न्हापायापिं अनुभवीपिंसं अनुभवया लिधंसाय् थीथी ग्रहतय्, थीथी राशीया भिं मभिं स्वयाः धया थकूगु, च्वया थकूगुया भरय् कनीम्हेसिनं धाःगु मिले जुइ ला? भिंगु राशी, ग्रह, नक्षत्र आदिया चरित्रय् भिं जुइ धाइसा मभिंगु राशी ग्रह नक्षत्रया चरित्रय् मभिं जुइ धाइ। हानं राहु केतु शनि मभिंपिं, मंगल, बुध, वृहस्पति आदि भिंपिं धइगु नं ला वहे अनुभवया आधारय् धाइगु ला खःनि। सुं नं मनुखं सुयां भविष्य कने फुम्ह जुल धाःसा व ला द्यः हे जुल नि। अझ द्यः स्वयां नं सः सिउम्ह जुल नि ।

ब्रम्हां मखुगु फताहा खँ ल्हाःगुलिं वयात सुनां नं पृथ्वीइ पुजा मयाः। विष्णु ला थुलि कुटनीतिज्ञ कि वयागु ला खँ हे ल्हानां मब्याः। उखे महाद्यः चाहिं थुलि भुलक्कड कि थः कलाः तकं दान बिया छ्वइम्ह। थज्याःपिं द्यःपिंसं ला थःथःगु भविष्य सीके मफयाः म्वाः मदुगु पञ्जाय् लाः धाःसा थौं वयाः क्षणिक न्यनेकनेया भरय् भविष्य कनेफुम्ह व मनू गुलि सः सिउम्ह जुइ? न्यनीपिंसं धाइ, मिले जू। अवस्था मिले जुइ। फुक्क मुखसां छतानिता ला अवश्य नं मिले जुइ। जिगु बिचाः कथं ला व मिले जूगु नं काकताली जक खः। लाक्क झिंनिगू राशी दु। गुंगू ग्रह दु। संसारय् च्वंपिं दक्व मनूत वहे ग्रह व राशी दुने लाइ ला? थ्व राशी व ग्रहया चरित्र स्वयाः बिचाः यानाः छिं जिं वा न्ह्याम्हेस्यां नं छम्ह कि छम्हेसिया जीवनय् मिले जू हे जुइ नि ।

जिं स्वयेबलय् ला भूषण दाहाल थेंज्याःम्ह आधुनिक युवकं अज्याःगु परम्परावादी सत्यतथ्यं तापाःगु मनूतय्त भ्रमय् लाकीगु ज्याझ्वः न्ह्याके मजिउ। थौंकन्हय् मनूतय्त अज्याःगु भ्रमपूर्ण ज्यापाखें तापाकाः सत्यतथ्यपाखे आकर्षित यायेमाःगु खः। शायद वय्कःया सत्यतथ्य स्वयां नं आधुनिक स्वयां नं लोकप्रिय ज्याझ्वःपाखे ध्यान वंगु खः ला?
गन तक लोकप्रियताया न्ह्यसः दु, थन त्रिशुल बाबा धामी, झाँक्री, द्यःमांपिं नं उलि हे लोकप्रिय। अथे धायेवं अज्याःगु ज्याय् प्रोत्साहन बीगु ज्या धाःसा बुद्धिमानी मखु। थ्व जिगु बिचाः खः। धारणा खः। जि ला पत्रिका स्वयेबलय् ई दत कि विज्ञापन तकं स्वयेगु। तर राशीफल मखु। जिं राशीफल गुब्सं मस्वया। जिगु बिचाःपाखें नेपाःमित राशीफल स्वयाः ज्या यायेगु ई मवःनि। राशीफल स्वयाः संकट खतरा आदि च्वयातल धाःसा छु वकुन्हु ज्या हे मयायेगु ला? हानं राशीफल स्वइपिंसं थःगु राशीफल छकः छगू जक पत्रिकाय् मखु निगू प्यंगू पत्रिकाय् छन्हु स्वयादिसँ थीथी पत्रिकाय् थीथी च्वयातःगु जुइ। अझ अःखः तकं जुइ। छगुलिं भिंगु च्वयातःगु दुसा मेगुलिं मभिंगु च्वयातःगु जुइ। आः विश्वास स्वयात यायेगु? मनूतय्त टेन्सन जक मखु ला? मनय् शंका जक मखु ला ?

जिगु थ्व खँ न्यनाः सायद भविष्य दर्पणय् विश्वास दुपिं, याइपिं भद्रभलादमीतय् चित्तय् स्यायेफु, नुगः स्यायेफु, वय्कःपिनि भावनाय् ठेस लायेफु। जिं वय्कःपिंत नुगः स्याकेगु, ठेस लाकेगु कथं धयागु मखु। ख ला थ्व थःथःगु विश्वासया खँ खः। जितः विश्वास मदयेवं सकसितं विश्वास दइ मखु धाये फइगु मखु। जिं धाये त्यनागु थुलि जक खः थौं कन्हय्या जमानाय् मनूतय्त अन्धविश्वास, सत्यतथ्यपाखे तापाःगु, बिना प्रमाणया लँय् वनेत प्रचार प्रसार यानाः प्रोत्साहन बी मजिउ ला धइगु जक खः। भविष्य दर्पण न्यनाः भविष्य दर्पण सिबें ज्या खँ यायेगु ई मखुत धइगु जक खः। धर्मभिरुपाखे यंके मजिउ धइगु जक खः। अथे हे तुं थज्याःगु धर्म कर्मय् विश्वास यानाः थीथी कथंया वस्तु छेँय् तयातल धाःसा, पुजा याना तल धाःसा, घाना तल धाःसा लक्ष्मी प्राप्त जुइ। धनधान्य जुइ। लँय् सम्पत्ति लुया वइ आदि इत्यादि धइ कथंया थीथी वस्तुया प्रचार प्रसारय् नं हये मजिउ। थ्व ला व्यापारिक विज्ञापन जुल। तर भिंगु मखु। खःगु मखु। ध्वं लायेगु जक खः। खुदा दे तु छप्पर फाडके धाये थें तुं ला खः नि ।

धाइ नि हँय् थकालि कि ख्यें थकालि? अथे हे तुं जितः नं धायेमास्ते व द्यः थकालि कि मनू थकालि? द्यवं मनू सृष्टि याःगु कि मनुखं द्यः धाःपिं सृष्टि याःगु? धात्थें द्यःपिंसं मनू व अन्य पशुपंक्षी सृष्टि याःगु खःसा द्यःपिंत सुनां सृष्टि यात जुइ? द्यःपिं अथें लुयावःगु, बुया वःगु, अथें उत्पत्ति जुया वःगु खःसा व द्यःपिनि नां सुनां तल जुइ? स्वयम द्यःपिंसं जिगु नां ब्रम्हा, जिगु नां विष्णु आदि धकाः धाःगु खः ला? अथवा द्यःपिंसं मनू सृष्टि याःगु मखु, मनू स्वयां प्राकृतिक रुपं सृष्टि जुयाः वेद, यजुतय्सं द्यःपिं सृष्टि यानाः मनुखं हे द्यःपिनि थीथी नां तःगु खः ला? थ्व निगू विषय धाथें हे बिचाः यायेबहःगु विषय
मखुला? आधुनिक सत्यतथ्यं जाःगु बिचाः स्वीकार यायेगु खः कि पौराणिक सत्यतथ्यं तापाःगु बिचाः स्वीकार यायेगु खः? थ्व विषयय् निर्णय याये फत धाःसा थःथःगु बिचाः गज्याःगु खः धइगु थुइके फइ। मखु निर्णय यानाः नं भ्रमय् च्वनाः निखें त्ययेका च्वनीपिं नं मदुइगु मखु। भ्रमय् लानाः निखें त्ययेकेगु नं बाध्यता जुइफु ।

मनूया भविष्य सुनां मसिउ। सी मखु। लँय् लँय् च्वनाः ल्हाः स्वयाः, ग्रह राशी स्वयाः भविष्य कनीपिं पण्डित ज्योतिष व छगू फोनया भरय् राशी न्यनाः, ग्रह न्यनाः भविष्य धाइम्ह कान्तिपुर टेलिभिजनया ज्योतिष दथुइ छु पाः? निम्हेसिया भविष्य दर्पण ला वहे खः नि। ग्रह, नक्षत्र, राशी आदिया चरित्र। मिले जूसां, मिले मजूसां छगू कथंया मनोरञ्जन जक खः नि। मिले जुल धकाः स्याबासी व मिले मजुल धकाः दण्डया व्यवस्था ला दुगु मखु। आदिंनिसें न्ह्याना वयाच्वंगु थ्व प्रथा अन्त्य तक नं न्ह्याना च्वनीतिनि। याये मयाये थःथःगु बिचाः विश्वास जक खः ।

More Stories Like this