पशुपतिइ भारतीय हस्तक्षेप
थौं नं पशुपति लागाय् निघौ चक्का जाम
येँ (सन्ध्या टाइम्स)/पशुपतिइ नियुक्त जूपिं भारतीय पुजारीतय्त स्थानीय जनतां म्हीग गुप्तवास च्वनाच्वंगु थासं पित हःगु घटनायात भारतं गुलि गम्भीरतापूर्वक काःगु जुयाच्वन धइगु खँ म्हिगः संस्कृति मन्त्री मिनेन्द्र रिजाल थः हे पशुपतिइ वनाः भारतीय राजदूतयात पिउ वंगु घटनां क्यना बिल ।
गुप्तवास च्वनाच्वंपिं भारतीय पुजारीतय्त म्हीग गुप्तवास हे पूमवंकं ज्वनाः पित हयेवं उमित म्हिगः प्रहरी पाः तयाः देगलय् दुत छ्वयाः पुजा शुरु याकूगु खः। वयां लिपा पुजारीतय्के क्षमा फ्वनेगु लागिं संस्कृति मन्त्री मिनेन्द्र रिजाल थःहे पशुपति वःगु खः। वय्कःयात पशुपति वयेगु लागिं भारतीय राजदूत राकेश सुदं फोन याना छ्वःगु जुयाच्वन। तर मन्त्री रिजाल पशुपति थ्यनं नं सुद धाःसा थ्यंकः मवःनि। अन मन्त्री रिजालं १ घण्टा फ्तुनाः सुदयात पियाच्वन। लिपा सुद वयेकाः तिनि वय्कःपिं निम्हं पशुपतिइ दुहां वन ।
भारतीय पुजारीयात आक्रमण यात धकाः म्हिगः भारतीय विदेशमन्त्रीं तकं सार्वजनिक रुपं न्ववासें थ्व ज्या माओवादीं याःगु धकाः द्वपं बिउगु खः। तर माओवादीं धाःसा थुकी थःपिनि ल्हाः मदु धकाः स्पष्ट यायेधुंकूगु दु ।
थ्वहे झ्वलय् गुप्तवासं पिने हःबलय् जनै चबूपिं पुजारीत पुनः जनै ग्रहण यायेगु धार्मिक विधान पूरा मयासे देगलय् दुहां वंगुलिं धार्मिक मनूतय्सं न्ह्यसः तया हःगु दु। छखे जनै चबूपिं व मेखे स्वन्हु गुप्तवास च्वनेमाःथाय् निन्हुं हे पिहां वःपिं पुजारीतपाखें पशुपतिया पुजा याकेबलय् थ्व पवित्र मजुइगु उमिगु दावी दु। आः पशुपतिया पुजारी नियुक्त याःपिं राघवेन्द्र भट्ट व गिरिश भट्ट नांयापिं थ्व पुजारीत वर्तमान भट्टया हे काय्चापिं खः। भारत वनाः थ्व भट्टत माला हयेगु लागिं हे सरकारं कांग्रेस पार्टीया सदस्य तकं मखुम्ह भारतीय मूलया सुशिल नाहटायात पशुपति विकास कोषया सदस्य सचिव नियुक्त याःगु खः ।
थ्वहे झ्वलय् भारतीय पुजारी विरोधी संघर्ष समितिं थ्व पुजारीत मचीकूतले संघर्ष जारी हे यानाच्वनेगु घोषणा याःगु दु। संघर्ष समितिं थौं सुथय् ९ निसें ११ बजे तक गौशाला, चाबही लागाय् यातायात बन्द याःगु खः ।
