सेनाया मापदण्डया अनावश्यक विवाद

सेना समायोजनया लागिं नीस्वंगु समितिं दयेकूगु प्राविधिक रिपोर्टयात कयाः राजनीतिक पार्टीतय् दथुइ विवाद पिहां वःगु दु। खास यानाः माओवादी सेनायात नेपाली सेनाय् समाहित यायेगु खःसा नेपाली सेनाया मापदण्ड कथं उपिं फिट मजू धइगु तर्क वयेवं थ्व विवाद नं वःगु खः। प्राविधिक रिपोर्टय् मापदण्ड मिले मजूसां नं सेनाय् वने चाहे जूपिं माओवादी लडाकुतय्त छ्वयेगु ह्वःताः बीमाः धइगु खँ न्ह्यथनातःगु दु। तर नेपाली कांग्रेसं धाःसा उकियात अस्वीकार याःगु दु। सेनाया मापदण्ड हीके फइ मखु धासें उकी फिट मजूपिं लडाकुतय्त नेपाली सेनाय् यंके मफइगु खँ उमिसं धयाच्वंगु दु। नेपाली सेनाया मापदण्डयात सुनां नं अस्वीकार यायेगु पाय्छि मखु। तर आः जुइत्यंगु सेना समायोजन धइगु नेपाली सेनाय् जुइत्यंगु न्हूगु भर्ति मखु। थ्व ला झिदँ तक न्ह्याःगु जनयुद्धयात विधिपूर्वक अन्त्य यायेगु लागिं सरकार व विद्रोही दथुइ जूगु सहमतिया छगू अंश खः। विद्रोही सेनायात समायोजन यायेमाःगु छगू विशिष्ट ई देशय् वयाच्वंगु दु। थज्याःगु विशिष्ट इलय् पुलांगु अवधारणा, मापदण्ड व बिचाःयात हिलाः जूसां समाधान लुइकेगु ज्या यायेमाः। पूरा मुलुक हे पुलांगु सम्पूर्ण मापदण्ड व मान्यतायात तोडे यानाः न्हूगु लँय् न्ह्याः वनाच्वंगु थ्व इलय् सेनां थःगु मापदण्ड हीके मखु धायेगु छुं नं कथं मिले मजू। अथे धकाः सुनां थःगु मापदण्डयात सदांया निंतिं हीकेमाःगु नं मखु। छुं जुयाः सेनाया थुलि हे अडानं यानाः शान्ति प्रक्रिया स्यन धाःसा उकिया जिम्मेवार सु जुइ? थ्व खँय् नं बिचाः जुइमाः ।

More Stories Like this