थौंया दिन कवि गुरु सिद्धिदास बूगु रे

महाकवि सिद्धिदास महाजु नेपाल संवत् ९८७ यंलागा दुतिया कुन्हु येँ केलत्वाःया क्वाछेँ ननिइ बूगु खः। वय्कःया मांया नां हर्षलक्ष्मी अले वय्कःया अबु लक्ष्मीनारायण महाजु खः ।

सिद्धिदासया मचांनिसें हे साहित्य प्रति तःधंगु रुची दुगु लानाच्वन। मचातिनिबलय् हे वय्कलं चखुं - बखुंतय्गु म्येँनिसें कयाः द्यःपिनि सिलः तकं च्वयादीगु दु। लिपा वनाः वय्कलं 'सत्यसति' खण्डकाव्य, न्हय्गू काण्ड पूवंगु 'सिद्धि रामायण' महाकाव्यनिसें 'सम्वाद', 'सज्जन हृदयाभरण', 'शुकरम्भा संवाद' आदि यानाः बासःगुलिं मल्याक सफू च्वयाः नेपालभाषा साहित्यया धुकू जायेकादीगु दु। वय्कलं च्वयादीगु आपालं कृतित आः तकं अप्रकाशित तिनि। वय्कः दुबलय् वय्कःया छगूयां छगू हे जक कृति पिहां वःगु लानाच्वन ।

देय् छगुलिं हे राणातय्गु क्रूर शासनया पंजाय् लानाच्वंगु उगु इलय् नेपालभाषाया काव्यया माध्यमं वय्कलं जागरणया सः थ्वयेकादीगु खः। वय्कःयात झी कवि चित्तधर 'हृदय' जुं नेपालभाषाया प्यंगः थां मध्ये छगः मू थां कथं कयादीगु दु ।

उगु इलय् सःसिपिं मनूतय् दथुइ साप हे ज्ञां दुम्ह, बुद्धि दुम्ह व बांलाक आखः च्वये सःम्ह कथं जाःम्ह जूसां सिद्धिदासं ज्यूताःछिं हे सुख धाःसा मसिउ। अथेसां छफुति हे हरेस मनसें नेपालभाषा साहित्यया धुकू जायेकेगु लिसें साहित्यया माध्यमं सामाजिक चेतना थनेगु व देशय् जागरण हयेत थःगु हे पहलं मदिक कुतः धाःसा यानां तुं झाल। 'उद्योगीया छेँस लक्ष्मी दुहां वइ' धयाः मनूतय्त कर्मशील जुइत हःपाः बियां जिल ला, 'राजनीति मसिउम्ह जुजु जुइ फइ मखु' धयाः राजनीतिक सन्देश बियां जिल ला, 'गबलय् तक झीसं मूर्ति पूजा याइ अबलय् तक सुख सी मखु' धयाः जागृत यानां जिल ला, 'भाषा म्वाःसा जाति म्वाइ' धयाः भाषिक चेतना थनां जिल ला सिद्धिदास महाजु मदिक्क थःगु च्वसाया बलं हालां तुं च्वनादिल ।

महाकवि सिद्धिदासं ने.सं.१०५० स थःगु नश्वर देह त्याग याना वंसां झीगु नुगलय् म्वानां तुं च्वंगु दु। वय्कःया कृतिं वय्कःयात अमर याना थकूगु दु ।

More Stories Like this