पवनेश्वर श्रेष्ठयात ग्वहालि यानादिसँ

नेपालभाषा म्यूजिक भिडियो निर्माता व कलाकार अले थीथी नेवाः संगठनय् आवद्ध जुयाः नेवाः जाति व भाषा ख्यलय् सकि्रय जुया च्वनादीम्ह पवनेश्वर श्रेष्ठ थुगु इलय् जीवनया विषम घडिइ लानाच्वंगु दु । उच्च शिक्षाया लागि सन् २००५ य् सं.रा. अमेरिका झायादीम्ह वय्कः सन् २००८ य् थःगु पढाइ सिधयेकाः ज्या न्ह्याकादीगु खःसा २००८ या हे अन्तपाखे वय्कःयात स्वँया क्यान्सर जूगु लुल । जटिलता अप्वयेवं छुं दिं न्ह्यः वय्कःयात आएसीयूलय् तःगु दु ।

भर्जिनिया राज्यय् च्वनादीम्ह पवनेश्वर श्रेष्ठ नेवाः व नेपाली थीथी संघ संस्थाय् आवद्ध जुयाः सकि्रय रुपं समाज सेवा याना झाया च्वनादीगु खः । विशेष याना नेवाः अर्गनाइजेशन अफ अमेरिकाय् वय्कःया तःधंगु योगदान दु । वय्कलं थःलिसे थः परिवार सकसितं समाजसेवाय् दुतिना दीगु दु । वय्कःया जहान सुनिता श्रेष्ठ स्वयम नेवाः ख्यःया नांजाःम्ह कलाकार व निर्देशक खः । वय्कलं नेवाः अर्गनाइजेशन अफ अमेरिकाया अन्तर्गत नेवाः मस्तय्त नेवाः भाय् स्यनेगु याना च्वनादीगु दु । वय्कःपिनि म्ह्याय् स्लेशा श्रेष्ठ (८ दँ) नं नेपालभाषाया थीथी फिल्मय् अभिनय यानादीगु दुसा थीथी नेवाः गतिविधिइ सकि्रय रुपं ब्वति कया च्वनादीगु दु ।

मिजास स्वभाव व परोपकारी भावनां जाःम्ह पवनेश्वर श्रेष्ठजुं मेपिन्त दुःख जुइगु भयं थःगु जीवनय् वःगु तःधंगु समस्या तकं मेपिन्त कनामदी, थुगु ल्वापुइ वय्कः याकःचा हे ल्वानादिल । आः परिस्थिति अझ ह्यूगु दु, वय्कः अले वय्कःया परिवारयात छि, जि, अले झी सकसियागुं ग्वहालि माःगु दु । नेवाः अर्गनाइजेशन अफ अमेरिकां वय्कःयात ग्वहालि यायेया लागि छगू फन्ड रेजिंग ज्याझ्वः न्ह्याकूगु दु । थुकिया मुक्कं जानकारीया लागि थुगु पेज स्वयादिसँ ।

झीगु चीधंगु ग्वहालि वय्कःपिन्त तःधंगु तिबः जूवनी । झासँ झी सकलें मिले जुयाः फुफुगु ग्वहालि याये, नेवाः एकता व परोपकारीताया दसि न्ह्यब्वये ।

More Stories Like this