पशुपतिया धाथेंयाम्ह नेपाली पुजारी सु ?
पशुपतिइ पुजारी नियुक्त यायेगु खँयात कयाः हानं विवाद पिहां वःगु दु। अन पुजा यायेगु ज्या याना वयाच्वंपिं
भारतीय पुजारीतय्त चीकेधुंकाः नेपाली पुजारी तयेमाः धइगु नामय् खस ब्रम्हूतय्त पुजारी तयेगु ज्या जुल। तर अदालतपाखें उगु ज्यायात पना बीवं आः हानं भारतीय पुजारी हे तयेगु ज्या जू वःगु दु। नेपाःया देगलय् हानं भारतीय पुजारी हे तल धकाः उकिया विरोधय् नं आन्दोलन जुयाच्वंगु दु ।
वास्तवय् पशुपतिया पुजारी सुयात तयेगु? आः चाहिं थुकिया बारे हचुवां मखुसें पूरा अध्ययन हे यानाः निर्णय यायेमाःगु आवश्यक जूवःगु दु। थुकिया निंतिं बरु माःसा विज्ञतय्गु छगू कार्यदल हे गठन यानाः इतिहासया अध्ययन याके बिउसा अझ बांलाइ। नेपाली पुजारी जक तयेगु धायेबलय् उकी नं लिपा हानं विवाद पिहां वयेफु। पशुपतिइ खय् ब्रम्हू सिबें नं न्हापांनिसें नेवाः समुदाय दुने लाःपिं राजोपाध्यायतय्त पुजारी तयेगु चलन जुयाच्वंगु ऐतिहासिक दसित दु। उकिया अवशेष तक नं थौं तकं दनि धाइ। थज्याःगु अवस्थाय् उकिया अध्ययन यानाः छगू ठोस निर्णयय् थ्यनेमाः। अज्याःगु निर्णय लागू जूसा जक उकियात सुनां हाथ्या बी फइ मखु। भारतीय पुजारी लिकयाः नेपाली पुजारी तयेगु खँ ला पाय्छि जू, तर नेपाली पुजारी तयेधुंकाः हानं ताःहाकः विवाद जुयाच्वनीगु खःसा उकी न्ह्यव हे बिचाः यायेमाल। इतिहास, परम्परा, संस्कृति आदि दृष्टिकोणं पुजारीया लागिं सु उपयुक्त खः वयात हे थुकिया हकदार दयेकेमाः। आः जुयाच्वंगु आन्दोलन नं थुखेपाखे हे केन्द्रित जुइमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
